Облыстық әкімдікте биылғы 8 айдың қорытындысы бойынша жергілікті атқарушы органдардың қатысуымен қаралған әкімшілік істердің қалыптасқан сот практикасын талқылау бойынша жиын өтті. Талқылауды ҚР Бас прокуратурасының Құқықтық статистика және арнайы есепке алу жөніндегі комитетінің Алматы облысы бойынша департаменті ұйымдастырды. Шараға облыстық сот, мамандандырылған ауданаралық әкімшілік сотының судьялары және жергілікті атқарушы органдар өкілдері қатысты.
Аталған жиында азаматтардың құқықтары мен бостандықтарын қорғау, заңды тұлғалардың мүдделерін әкімшілік сот төрелігі аясында мемлекеттік органдардың заңсыз әрекеттері мен шешімдерінен қорғауға қатысты бірқатар мәселелер талқыланды. Қазақстан Республикасы Бас прокуратурасының Құқықтық статистика және арнайы есепке алу жөніндегі комитетінің Алматы облысы бойынша департаментінің бастығы Нұрлан Ауғанбаевтың айтуынша, облыстық мемлекеттік органдарға жыл басынан бері 205 мыңнан астам шағым түсіп, олардың 137 мыңнан астамы қаралған. Шағымдардың басым көпшілігі жер мәселесі, сәулет және тұрғын үй қатынастары, еңбек құқықтары, білім беру, көлік және коммуникация мәселесіне қатысты.
Облыс әкімі аппараты азаматтардың өтініштерін қарауды бақылау бөлімінің басшысы Зухра Тоқбаева да өтінішпен жүгінушілер қатарының көбейгенін растады. Оның айтуынша, Қарасай және Іле аудандарынан түсетін электрондық өтініштердің саны артқан.
«Облыс әкімдігінде «Алматы облысының ықтимал әлеуметтік шиеленіс ошақтары картасы» тоқсан сайын жасақталып, аймақ басшысы тарапынан бекітіледі. Оған қоса, «Өзекті мәселелер картасы» жасалды. Соған сәйкес, облыс әкімінің қатысуымен азаматтарды қабылдау жүргізіліп, хаттамаға енгізіледі. Сол арқылы жауапты мекеме басшысына тапсырма беріліп, оның орындалуы бақылауға алынады. Жеке және заңды тұлғалар өтініштерін электронды цифрлық қолтаңба кілтін пайдалана отырып өз өтініштерін «е-Өтініш» ақпараттық жүйесі арқылы қалдыруға және мемлекеттік органға келіп түскеннен бастап орындалу дәрежесінің тізбесімен танысуға мүмкіндігі бар», – деді Зухра Тоқбаева.
Департамент бастығы Нұрлан Ауғанбаев жиын барысында арыздарды қарау сапасы төмен екенін айтты. «Әлі де болса көптеген кемшілік орын алып отыр. Оған тұрғындар тарапынан түсетін арыз-шағымдар дәлел. Алайда, осы арыздарға сапалы, толық жауап берілмейді. Тіпті, қарапайым хаттарға да мардымсыз жауаптар келеді. Мұның өзі мәселенің қайта туындауына себеп болады. Ал мемлекеттік қызметтің сапасын арттыру қызметкерлерге байланысты. Сондықтан, бұл бағыттағы бірлескен жұмыс алға қарай да жалғасын табады. Біз осы негізде құқықтық статистиканың шынайылығын қамтамасыз ету және анықталған сәйкессіздіктерді жою бойынша жүйелі жұмыстарды жүзеге асырамыз», – деді Нұрлан Жолдасұлы.
Ерзат Асыл
