Қонаев қаласында «Қазпошта» АҚ Алматы облыстық филиалының ұйытқы болуымен Баспасөзге жазылу күні өтті. Жыл сайынғы бапасөзге жазылу науқанының басталуына арналған іс-шараға облыстық «Алатау арайы», «Огни Алатау» және «Алатау ардагері», Қонаев қалалық «Нұрлы өлке» газеттерінің өкілдері қатысып, басылымдар жайлы ақпаратты келушілерге таныстырды. Оқырмандармен жүздесіп, пікір алмасты.
Газет пен оқырман арасындағы байланысты нығайту мақсатында өткен шара аясында облыс орталығынан шығатын басылымдарға жазылу ұйымдастырылды. Пошта қызметкерлері тарапынан келушілерге арнайы фуршет дайындалды. «Өлке тынысы» ЖШС алғашқы бес адамды «Алатау арайы», «Огни Алатау» газеттеріне тегін жаздырды. Мұндай игі істі облыстық пошта да жалғастырып, оқырмандардың сүйікті басылымдарымен келесі жылы да қайта қауышуына себепкер болды. Алғашқылардың қатарында Бақытбек Дәулетов, Орынбай Бейсенбайұлы, Қанат Молдабергенов есімді қала тұрғындары жазылды. Олар басылым өкілдері мен пошта қызметкерлеріне жылы лебізін арнады.
Тағы бір айта кетерлігі, пошта ғимаратында бас қосқандардың көпшілігі өздерінің сүйікті «Алатау арайы», «Огни Алатау» газеттеріне жазылу үшін арнайы келген. Бұған куә болған біз де бір марқайып қалдық. Сондай-ақ аталған басылымдарға биыл алғаш рет жазылушылардың қатары молая бастағаны да көңіл қуантады.
– Жылдағы дәстүр бойынша өтіп жатқан шара тұрғындардың баспасөзге жазылуына септігін тигізетіні анық. Ұлттық құндылықтарды дәріптеуде баспасөздің үлесі мол. Қазіргі кезде әлеуметтік желінің ақпарат таратудағы жылдамдығын жоққа шығармаймын. Алайда халық пен билік арасындағы алтын көпірге айналып отырған мерзімді басылымдар нақты деректерге сүйене отырып, шынайы ақпарат таратады. Осы орайда мемлекетік саясатты насихаттау мен облыстың өсіп-өркендеуіне үлес қосып жүрген «Алатау арайы», «Огни Алатау» газеттері жұртшылыққа етене таныс. Оқырман мен газет редакцияларының арасындағы байланысты нығайтуға бағытталған бүгінгідей іс-шаралар көбейе берсін! Баршаңызды өңірде болып жатқан жаңалықтардан хабардар болып, сараптамалық, әдеби-танымдық мақалаларды оқығыларыңыз келсе, облыстық газеттерге жазылуға шақырамын, – деді Қонаев қалалық ардагерлер кеңесінің мүшесі Жақан Ахаев.
«Алатау арайы», «Огни Алатау» газеттерінің редакторлары Қуаныш Тұнғатар мен Забира Сайділдина облыстық пошта басшылығына оқырмандардың арыз-шағымын жеткізіп, пошта қызметінің көңіл көншітпейтін тұстарына тоқталып, ұсыныс-пікірлерін ортаға салды.
Өз кезегінде «Қазпошта» АҚ Алматы облыстық филиалының директоры Данияр Итибаев, республикалық баспасөз тарату басқармасының менеджері Рахымжан Бәтешов мерзімді басылымдардың оқырманға дер кезінде жетуі үшін қажетті жұмыстар қолға алынатынына уәде етті.
Осылайша облыстық пошта ғимаратындағы мерзімді басылымдар мен оқырман арасындағы байланысты жандандыру бағытында ұйымдастырылған маңызы зор іс-шара «Бүгінде ешкім газет оқымайды» дейтіндердің қателесетінін тағы бір мәрте дәлелдеді.
Айжарық КӨПТІЛЕУОВ
Қонаев қаласы
