Өңірлік коммуникациялар қызметінің ақпараттық алаңында өткен баспасөз мәслихатында облыстағы экологиялық ахуал жайы сөз болды. Аталған тақырыпқа орай облыстық экология департаментінің мемлекеттік экологиялық бақылау бөлімі басшысының міндетін атқарушы Алина Түсіпбаева баяндама жасады.
Спикер алдымен қоғамда резонанс тудырған «Алматы – Өскемен» автожолының батыс бағытында орналасқан тұрмыстық қатты қалдықтар полигонындағы өрт мәселесіне тоқталды. Айтуынша, «ADC TAZA ALEM» ЖШС-на аталған аумақта 2020 жылдың 26 маусымынан 2027 жылдың 31 желтоқсанына дейін жұмыс істеуге мүмкіндік берілген. Соған сәйкес жылына 7354,81 тонна қалдық көмуге рұқсат етілген. Уәкілетті органдардан келіп түскен материалдар мен жүргізілген тексерістер нәтижесінде экологиялық заңнама талаптары бұзылғаны анықталған. Бұған жауапты заңды тұлғалар ҚР Әкімшілік құқықбұзушылық туралы кодексінің 336-бабы 1-бөлігінде көрсетілген қалдықтарды сақтау мен жағу кезінде өрт қауіпсіздігі талаптарының сақталмауы бойынша әкімшілік жауапкершілікке тартылған. Айыппұл сомасы – 1 452 000 теңге. Өрт ауданы 12 гектар аумақты шарпыған. «Қазіргі таңда тұрмыстық қатты қалдықтар полигонының қызметін уақытша тоқтатып, Алматы облысының резервтік жер қорынан жер телімін бөліп, басқа орынға көшіру қажет деп санаймыз», – деді Алина Мұратқызы.
Брифинг барысында облыстағы Ащыбұлақ ауылдық округінде жер көлемін ұлғайту мақсатында Тереңқара өзеніне қалдықтар төгу дерегі тіркелгені айтылды. «Осы жылдың 22 тамызында өзенге құрылыс, тұрмыстық және өндірістік қалдықтардың заңсыз төгілуі анықталды. Бұл ҚР Экологиялық кодексінің 320-бабына және табиғатты қорғау заңнамасына қайшы келеді. Анықталған заңбұзушылық бойынша бірқатар жер иелеріне әкімшілік айыппұл салынды. Оларға өзеннің табиғи арнасын қалпына келтіру, келтірілген залалды өтеу бойынша нұсқаулық берілді. Сондай-ақ облыстық жер ресурстарын басқару департаментіне, Балқаш-Алакөл бассейндік инспекциясына және Ащыбұлақ ауылдық округі әкімдігіне тиісті шара қолдану тапсырылды», – деді спикер.
Гүлзат АЗАТҚЫЗЫ
