Балқаш ауданындағы елдімекендер жоспарға сәйкес кезең-кезеңімен көгілдір отынға қол жеткізуде. Жыл соңына дейін Бақанас ауылындағы жаңа шағынаудан мен Ақжар ауылында газ құбырын орнату құрылысы аяқталмақ.
– 2019 жылдан бері Балқаш ауданында газбен қамту жұмысы жүйелі жүргізіліп келеді. 2023 жылы Миялы, Бақбақты, Бірлік, Бақанас, Ақдала, Бояулы елдімекендеріндегі 1500 тұрғын үйге газ қосылып, қазіргі таңда ауыл тұрғындары көгілдір отынның игілігін көруде. Биыл «ТурГаз» ЖШС-мен Ақжар ауылына газ желісін тартуға 809 млн теңгеге келісімшарт жасалған. Сондай-ақ Бақанас ауылындағы жаңа ықшамауданды газбен қамтамасыз ету үшін 414 млн теңге қарастырылған. Жыл соңына дейін осы екі жоба толығымен аяқталады. Сонымен қатар Береке ауылына газ құбырын тарту үшін жобалық-сметалық құжаттары әзірленіп, 1 млдр 199 млн теңгеге мердігермен келісімшарт жасалған. Бұл жұмыс келесі жылға жоспарланған. Одан бөлек Бура, Үшжарма, Ақкөл ауылдарын газбен қамту 2026-2027 жылдарға арналған бюджет жоспарына енгізілді. Осылайша 2027 жылға дейін аудандағы 20 елдімекеннің 11-і яғни 55 пайызы газ желісіне қосылмақ. Қалған ауылдар 2030 жылға дейінгі бас жоспарға енгізілген, – деді Балқаш ауданының әкімі Азат Құтпанбетов.
Бақанас ауылының тұрғыны, көпбалалы ана Үміт Байдабекова газ желісіне былтыр қосылғанын айтты. «Бұған дейін жылына 4-5 тонна көмір жағатынбыз. Күйеуім екеуміз күнде жұмыста болғандықтан балалар үшін алаңдайтынбыз. Газ қосқалы уайымымыз азайды, үйіміз де жып-жылы болып тұрады. Ауылымызға осындай жағдай жасалғанына қуаныштымыз», – деді ол.
Ақжар ауылының тұрғыны Гүлмария Шопанбаева: «Қазіргі таңда үйімізді от жағып жылытамыз. Бір тонна көмірді 35-40 мың теңгеге сатып аламыз, ағаш отын түсіреміз. Бұл қалтаға біраз жүк салады. Газ құбырын орнату жұмысы ойдағыдай аяқталып, көгілдір отынға тезірек қолымыз жетсе екен деген ниетіміз бар», – деді.
Бүгінде Ақжар ауылында жоғары қысымда – 5397 метр, орташа қысымда – 1127 метр, төмен қысымда 6 715 метр газ құбыры, 46 тұрғын үйге газ есептеуіш орнатылған. Құрылыс жұмысы әлі де жалғасуда.
Гүлзат БАЙҚОНЫСОВА
Балқаш ауданы
