Ақтау қаласында өткен «Mangystau International Tourism Forum» аясында Алматы облысы бірден екі беделді марапатқа ие болып, еліміздің жетекші туристік аймағының бірі ретіндегі жоғары мәртебесін тағы бір мәрте дәлелдеді.
Алғашқы марапат «ASP Арена» холдингінің бас директоры Олег Воронковқа туризмді дамытуға қосқан зор үлесі үшін табысталды. Ол Қазақстан Республикасының Туризм және спорт министрінің Алғыс хатымен марапатталды. Бұл марапат оның көп жылғы еңбегі мен өңірдің туристік саласын ілгерілетуге қосқан белсенді еңбегі үшін берілді. Сонымен қатар, демалушылардың пікірлері мен тәуелсіз бағалау нәтижелері бойынша, Қонаев қаласындағы №5 жағажай «Еліміздегі ең үздік жағажай» деп танылды. Мұндай жоғары баға қояр кезде жағажайдың инфрақұрылым сапасы, сервистік деңгейі және аумақтың абаттандырылуы ескерілді. Бұл орын бүгінде өңір тұрғындары мен қонақтарының сүйікті демалыс аймағына айналып отыр.
Алынған марапаттар өңірдің туризм саласындағы табысты саясатының айғағы болды. Алматы облысы инфрақұрылымды дамыту, туристерге қолайлы жағдай жасау және инвестициялық тартымдылықты арттыру бағытында жүйелі жұмыс жүргізіп келеді. Осылайша, Алматы облысы өзінің жоғары туристік әлеуетін тағы бір мәрте дәлелдеп, жетістіктері халықаралық дәрежеде мойындалды.
Өз тілшіміз
