Облыс әкімі Марат Сұлтанғазиев іссапармен Іле және Қарасай аудандарына барып, ондағы жаңадан салынып жатқан нысандар – мектеп, тұрғын үй мен болашақ зауыт алаңы жұмысымен танысты. Ең алдымен Іле ауданы Н.Тілендиев ауылындағы «Келешек мектептері» жобасы аясында бой көтерген мектепке табан тіреді.
Облыстық білім басқармасының басшысы Арайлым Төлеубекованың айтуынша, аталған жоба аясында 17 мектеп салынып біткен. Жыл соңына дейін Талғар ауданында 4, Еңбекшіқазақ ауданында 2, Іле, Алатау, Қарасай аудандарында бір-бірден, барлығы 9 мектептің құрылысы аяқталып, қолданысқа берілмек. 2023 жылдан бері үшауысымды 53 мектеп болған болса, аталған нысандардағы жұмыс аяқталса, олардың саны 23-ке қысқарады.
«Н.Тілендиев ауылындағы мектеп – 900 орынды. Осы ауылда 600 орынды білім ошағы бар, қазір онда 1800-ден астам бала үшауысымда оқып жатыр. Мектеп құрылысы аяқталғанда ондағы жарты оқушыны, қызметкерлерді жаңа нысанға көшіреміз. Мектеп заманауи талаптарға сәйкес жобаланған. Кең кабинеттер, зертханалар, акт және спорт залдары, 250 балаға арналған асхана бар», – деді Арайлым Ақсубайқызы.
Білім беру ордасындағы құрылыс барысы туралы учаске бастығы Жалын Ынтықбаев айтып берді. «Мектеп құрылысы 2023 жылдың қыркүйегінде басталды, осы жылы қараша айының соңында бітеді деп жоспарланған. Жалпы ауданы – шамамен 5 мың шаршы метр. Қазіргі таңда 140 адам еңбек етуде», – деді ол.
Облыс әкімі Марат Елеусізұлы жұмыс қарқыны баяу жүріп жатқанына ескерту жасап, тапсырыс беруші «Самұрық-Қазына» және мердігер «EXCLUSIVE Construction» компаниясына құрылыс сапасы мен нысанды мерзімінде тапсыру жөнінде тапсырма берді.
Келесі кезекте Қараой ауылындағы жеке инвестор есебінен салынған әлеуметтік осал топтағы жандарға берілетін тұрғын үй құрылысына атбасын бұрды. Жоба осы жылдың шілде айында басталған, желтоқсанда толығымен аяқталады деп күтілуде. Инвестиция сомасы – 3, 3 млрд теңге. Тұрғын үй саны – 114. Әр үйде төрт бөлмелі 2 пәтер, әрқайсысына 4 сотық жеке жер учаскесі қарастырылған. Жеке инвестор Ұлан Солтанбековтің айтуынша, құрылысқа байланысты мәселе жоқ. Үйлер жылу сақтайтын және дыбыс өткізбейтін материалдардан салынған. Инженерлік желілер жүргізілген, сонымен қатар қиыршық тастар төселуде. Инвестор алдағы уақытта балалар алаңын орнатуды жоспарлап отыр. Аудан әкімдігі жобаның 30 үйіне 50 пайыз төлем жасалғанын, ал оны жалғастыру үшін келесі жылы қосымша қаржыландыру қажет болатынын жеткізді.
Сапар Қарасай ауданы Елтай ауылдық округі маңындағы «Jiang nan Kazakhstan» ЖШС іске асырып жатқан сэндвич-панельдер, алюминий бұйымдар және кабель-құралдар өндірісінің, сондай-ақ көтерме сауда орталығының индустриялық-логистикалық алаңында жалғасты. Жоба құны – 50 млрд теңге, 2025–2027 жылдар аралығында салынып бітеді деп жоспарланған. Өндіріс іске қосылғаннан кейін 2,5 мыңнан астам жаңа жұмыс орны ашылмақ. Сондай-ақ ішкі нарыққа, ТМД елдеріне және Қытайға тауар жеткізумен де айналысады.
Соңғы нысан Қарасай ауданы Бұлақты ауылындағы 900 орынды мектеп құрылысы болды. Қазір мұнда 110 адам екі ауысыммен еңбек етуде. Бұл білім ошағы да «Келешек мектептері» бағдарламасы бойынша салынуда. Құрылыс соңғы кезеңге жақындағанымен, трансформаторлық қосалқы стансаны көшіруге байланысты электрмен қамтамасыз ету мәселесі әлі шешілмеген.
«Білім ошағы жаңа жұмыс орындарын ашуға және заманауи оқыту жүйесін қалыптастыруға септігін тигізеді. Оқушылар мен мұғалімдер жаңа әрі жайлы орынға көшуді асыға күтуде», – деген Марат Сұлтанғазиев жауапты мекемелерге электрмен қамтамасыз ету мәселесін жылдам шешуді тапсырды. Мектеп құрылысы аяқталып, қолданысқа берілсе, Қарасай ауданындағы үшауысымды мектептер мәселесі толығымен шешілмек.
Гүлзат БАЙҚОНЫСОВА
Іле, Қарасай аудандары
