Қарасай ауданының орталығы Қаскелең қаласында Республика күніне орай «Таза Қазақстан» экологиялық бағдарламасы аясында «Тазалық – тәртіп пен мәдениеттің айнасы» атты экологиялық акция ұйымдастырылды.
Акция тұрғындардың экологиялық жауапкершілігін арттыруға, елдімекендердің санитарлық жағдайын жақсартуға және тұрақты даму саласындағы мемлекеттік саясатты қолдауға бағытталған. Іс-шараға 50-ден астам адам қатысты. Олардың қатарында жастар ұйымдарының өкілдері, қоғам белсенділері және спорт саласының қызметкерлері болды. Акцияға қатысушылар елдімекен аумағын тұрмыстық қалдықтардан тазалап, қоршаған ортаны қорғау және қалдықтарды ұқыпты пайдалану бойынша түсіндіру жұмысын жүргізді.
Шара барысында Қарасай аудандық мәслихат депутаты Бекжан Сунбеков сөз алып, экологиялық мәселелерді шешуде қоғамдық белсенділік пен ынтымақтастықтың маңыздылығын атап өтті:
– Бүгінгі тазалық акциясы – қоршаған ортаға деген жауапкершіліктің көрінісі. Мұндай шаралар тұрғындардың экологиялық мәдениетін арттырып, туған жеріміздің көркеюіне үлес қосады. Әрқайсымыз тазалыққа атсалыссақ, ауданымыз да, еліміз де таза әрі әдемі болады, – деді депутат.
Бұл күні атқарылған жұмыстың нәтижесінде шамамен 2 тонна қоқыс жиналып, 8-ден астам техника жұмылдырылды. Мұндай экологиялық іс-шара алдағы уақытта да тұрақты түрде жалғасын табады.
Қуат Әбіл
Қарасай ауданы
