Қонаев қалалық көпсалалы ауруханасында жапондық жетекші мамандардың қатысуымен операциялық эндоскопия бойынша халықаралық шеберлік дәрісі басталды. Бұл ауқымды шара Қазақстан медицинасының дамуына және хирургия саласындағы халықаралық ынтымақтастықты нығайтуға маңызды үлес болып отыр.
Алматы облысы Денсаулық сақтау басқармасының басшысы Ержан Әбілқасымұлы Сүлейменов атап өткендей, шеберлік сабағын өткізу – бұл жай ғана тәжірибе алмасу емес, халықаралық стандарттарды отандық тәжірибеге енгізудің нақты қадамы.
“Біз жапондық ғылыми орталықпен келісімге келудің соңғы кезеңіне шықтық. 2026 жылдан бастап Алматы облысының хирургтары мен эндоскопистері Жапонияда тегін оқып, тағылымдамадан өте алады. Қатысу шарттарының бірі – ағылшын тілін білу. Бұл жас мамандар үшін үлкен ынталандыру болады және денсаулық сақтау жүйесінің кадрлық әлеуетін нығайтады”, – деді басқарма басшысы.
Сонымен қатар, оның айтуынша, қазақстандық дәрігерлер елдің жетекші медициналық мекемелерінің бірі болып саналатын Астанадағы Ұлттық онкология орталығына да оқуға жіберілетін болады.
“Біздің мақсатымыз – медициналық кадрлардың кәсіби дамуын үздіксіз қамтамасыз ету және озық технологияларды енгізу”, – деп толықтырды Денсаулық сақтау басқармасының басшысы.
Шеберлік сабағына Жапониядан келген екі жетекші маманмен қатар, Қазақстан Республикасының штаттан тыс бас эндоскописі, профессор Қанат Өмірзақұлы Батырбеков қатысуда. Екі күн бойы эндоскопиялық операциялардың көрсетілімдері, оқу сессиялары және клиникалық жағдайларды талқылау өтеді.
Жапондық мамандардың отандық дәрігерлерді оқытуға қатысуы – денсаулық сақтау жүйесінің дамуына қосылған баға жетпес үлес. Мұндай іс-шаралар тек персоналдың біліктілігін арттырып қана қоймай, медициналық көмектің сапасын стратегиялық тұрғыдан күшейтуге ықпал етеді.
Медициналық мекеменің Эндоскопия орталығының меңгерушісі, хирург дәрігер Тахир Закирұлы Шкуралиевтің айтуынша, жапон эндоскопия мектебі жоғары техникалық дәлдігімен қатар, ұқыпты араласу философиясымен ерекшеленеді. Оның сөзінше, Алматы облысының мамандары тек технологияны ғана емес, сол көзқарас пен ойлау жүйесін де меңгеріп жатыр. Бұл бүкіл эндоскопия қызметінің дамуына жасалған маңызды қадам.
Қазақстандық эндоскопиялық қоғамдық бірлестігінің төрағасы, профессор Қанат Өмірзақұлы Батырбековтің пікірінше, мұндай шеберлік сабақтарын өткізу – саланың өсуінің басты кепілі. Оның айтуынша, дәл қазіргі режимде көруге болатын операциялар, нақты жағдайларды талқылау, халықаралық сарапшылармен қарым-қатынас – мұның барлығы пациенттерге көрсетілетін көмектің сапасына тікелей әсер етеді.
Шеберлік сабағының екінші күнінде пациенттерді консультациялау, қосымша хирургиялық көрсетілімдер және сараптамалық пікірталастар жоспарланған.
Осындай деңгейдегі іс-шараның Қонаев қаласында өткізілуі отандық мамандардың жоғары кәсіби даярлығының және қазақстандық медицинаның халықаралық кәсіби ынтымақтастыққа ашықтығының дәлелі болды.
