Қонаев қаласындағы балаларды бейімдеу орталығының тәрбиеленушілері қарттарға құрмет көрсетті. Олар «Шапағат» арнаулы әлеуметтік қызмет көрсету орталығына арнайы барып, концерттік бағдарлама қойды.
Мерекелік шара барысында балалар қарттарға арнап ән шырқап, өлең оқып, би биледі. Риза болған қариялар жеткіншектерге ағынан алғыс жаудырды. «Біздің жағдайымызды сұрап, көңілімізді аулағандарыңызға рақмет. Балалардың күлкісін көріп, шаттанып қалдық. Ең бастысы, үлкенге құрметтің ұмытылмай келе жатқаны қуантады. Осындай сәттер бізге демеу болады» – деді орталықтағы қарттардың бірі.
Шараны ұйымдастырушылардың сөзінше, олар балалар бойына халқымыздың қадір-қасиетін сіңіру, үлкенді сыйлай білуге, аталы сөзден ғибрат алуға тәрбиелеу мақсатында аталған игі іске мұрындық болыпты. Ал «Шапағат» орталығы директорының орынбасары Бибінұр Омарованың айтуынша, бүгінде мұнда 130-дан астам қарт өмір сүріп жатыр. Олардың барлығы мемлекеттің қамқорлығында.
Шара соңында орталық тәрбиеленушілері аталған қарияларға жиі барып тұруға уәде етті, қарттар да балаларға ақ батасын берді.
Ермұрат МҰҚЫРБАЙ
Қонаев қаласы
