Республика күніне орай Қарасай ауданы Елтай ауылындағы мектеп оқушылары үшін тәрбиелік мәні зор, тағылымды шара өтті. Оқушылар Қарасай ауданы бойынша шекара басқармасының «Қаскелең» шекара бөлімшесіне арнайы барып, әскери өмірмен танысты.
Аталған шараның басты мақсаты – жас ұрпақтың бойына Отанға деген сүйіспеншілік пен мақтаныш сезімін қалыптастыру, Қазақстан Республикасының мемлекеттік шекарасын күзететін сарбаздардың еңбегін бағалай білуге үйрету, патриоттық тәрбиені нығайту. Сонымен қатар Республика күнін ерекше форматта атап өту арқылы жас ұрпаққа қасиетті мерекенің маңызын терең ұғындыру көзделді.
Оқушылар әскери бөлімшенің ішкі құрылымымен, күнделікті тәртібімен, сарбаздардың қызмет барысымен және шекара күзетінде қолданылатын техникалармен танысты. Әскери қызметшілер өз тәжірибелерімен бөлісіп, Отан алдындағы адал қызметтің маңыздылығы, шекараны қорғаудағы қырағылық пен жауапкершілік туралы әсерлі әңгімелер айтты.
Шекарашылармен өткен кездесуде оқушылар өздерін қызықтырған сұрақтарын қойып, толық әрі нақты жауаптар алды. Әсіресе әскери киім үлгісі, байланыс құралдары мен патрульдік техника балалардың ерекше қызығушылығын тудырды.
Мұндай шаралар жас ұрпақтың бойында Отанға деген құрметті арттырып қана қоймай, әскери мамандыққа деген қызығушылықты оятып, болашаққа бағыт береді. Бұл – мектеп қабырғасынан бастап патриоттық тәрбие берудің, азаматтық жауапкершілікті қалыптастырудың жарқын үлгісі.
Республика күніне арналған кездесу білім мен тәрбие, әскери рух пен елжандылықтың тоғысқан тұсы болды. Жас буын шекарашылардың қызметіне қарап, ел қорғаудың қаншалықты абыройлы әрі жауапты іс екенін түсінді.
Осындай мазмұнды шаралар алдағы уақытта да өз жалғасын табады деген сенімдеміз. Себебі, елін сүйетін ұрпақ – тәуелсіз елдің тірегі.
Қанат Советханов,
ҚР ҰҚК Шекара қызметі облыстық департаменті Қарасай аудандық шекара басқармасы
«Қаскелең» шекара бөлімшесі бастығының орынбасары, аға лейтенант
