Жамбыл ауданының Ақсеңгір ауылындағы Республика көшесіне асфальт төсеу жұмыстары аяқталды. Игілікті істің дәл осы мерекеге орай тиянақталуын тұрғындар жақсылыққа жорып отыр. Егемен еліміздің төл мерекесі қарсаңындағы айтулы оқиғаны көше тұрғындары ақ түйенің қарны жарылған күндей қабылдады.
Республика көшесіндегі № 41 үй тұрғыны Аманжол Уәлиев көршілер ризашылығын бізге былайша жеткізді:
– Ауылымыз көркейіп келеді. Жаңа үйлер көптеп салынып, керегесі кеңеюде. Бұл көше де кейінгі ширек ғасырға жетер-жетпес уақытта пайда болды. Сондықтан да мұндағы үйлердің бәрі жаңа. Мен де осыннан жер телімін алып, үй тұрғызып алғанмын. Оған да 20 жылдай болып қалды. Ал соңғы 3-4 жылда ауылда көптеген игілікті іс атқарылды. Орталықтандырылған су жүйесі іске қосылып, таза ауызсу тәулік бойы тоқтаусыз берілуде. Кезінде тұрғындар өз күштерімен орнатқан электр желісі қайтадан жаңалап тартылды. Табиғи газға қол жеткіздік. Енді, міне, мереке қарсаңында көшеміз толықтай асфальтталды. Осындай игіліктің барлығы мемлекеттің қаржысына жасалды. Біз бұған өте ризамыз. Ауылымыздың әкімі Ержан Әбдікерімұлының да өз міндетін дұрыс орындағанының нақты дәлелі осындайдан көрінсе керек, – дейді шаңырақтың отағасы, бес баланың әкесі Аманжол Жүкенұлы. Қырық үйлі көшенің белсенді тұрғындары Оралбек Жексенбайұлы, Тұрсын Рысбек және Жасұлан Отызбаев та осындай пікірде.
Республика көшесінде халыққа қажетті инфрақұрылым толық қамтылған. Тұрғын үйге қажетті су жүйесімен, газ құбырымен, қолжетімді байланыс пен ақпарат үшін интернет желілерімен қамтамасыз етілген. Бұл көшеге 2021 жылғы 29 желтоқсанда облыстық ономастикалық комиссиясының шешімімен Республика атауы берілген. Ақсеңгірдің негізгі көшелерінің біріне жататын Республика көшесінің ұзындығы – 740 метр. Ондағы жалпы тұрғындар саны – 112, аула саны – 35. Тұрғындары қарапайым және қонақжай. Көшеге жаңа асфальт жабындысы толықтай төселді, енді жол белгілерін орнату, жиегін көркейту жұмыстары атқарылады.
Ақсеңгір ауылдық округінде 4 елдімекен бар. Ақсеңгір, Жайсаң, Көкдала ауылдары мен Жиренайғыр бекетіндегі жалпы халық саны – 5246 адам. Аудан орталығынан 50 шақырымдай қашық жатқан бұл аймақ өзіне тән табиғатының тазалығы, әсемдігі, ауа райының қолайлылығымен ерекшеленеді. Аталған елдімекендердің тұсынан Ақсеңгір өзені ағып өтеді. Шөбі шүйгін, топырағы құнарлы, мал шаруашылығына және егін шаруашылығына ыңғайлы мекен.
Серік САТЫБАЛДИЕВ
Ақсеңгір ауылы,
Жамбыл ауданы
