Облыс әкімі Марат Сұлтанғазиев Іле ауданындағы жұмыс сапары кезінде тұрғындарды жеке мәселелері бойынша қабылдаған болатын. Онда Боралдай кентінің тұрғындары, ауыл белсендісі Раушан Өтепбергенова мен Наталья Аношкина елдімекендегі ауызсу жүйесін жаңғырту және жолдардың қалпына келтірілуі мәселесін көтерген еді. Осыған орай облыс әкімі елдімекенге арнайы барып, жобалардың іске асу барысын тексеріп, жергілікті тұрғындармен кездесті.
Кент тұрғындарының айтуынша, соңғы жылдары инженерлік желілердің ұзаққа созылған құрылысы салдарынан жолдар бүлініп, жүру қиындаған. Мұндай жағдайға су құбырын жүргізу үшін қазылған ауылішілік жолдардың дер кезінде қайтадан көмілмеуі себеп. Құрылыс компаниясы ала жаздай жұмысты аяқтамай, еш себепсіз созуда. Салдарынан көшенің шаңы аспанға шығып, көлік кептелісі пайда болған. Кент тұрғындарының жүріп тұруына үлкен кедергі келтірген.
Облыс басшысы мәселенің мән-жайына үңілу үшін құрылыс компаниялары өкілдерін шақырды. Мұндағы мәселені екі мердігер компания туындатып отыр. Біріншісі – «Астана Инжкомстрой» ЖШС. Ол сумен қамтуды қайта құру жобасын жүзеге асыруда. Жобаның жалпы құны 2,4 млрд теңгеден асады. Тапсырыс беруші – Іле ауданының тұрғын үй-коммуналдық шаруашылық бөлімі. Аталмыш жұмыс Боралдай кенттік округінің «Водник-3» шағынауданының жеке секторын, шағынауданның бір бөлігі саналатын Ломоносов және әуежайға алып баратын тас жолдарды қамтиды. Екінші компания – «Арман АВК» жауапкершілігі шектеулі серіктестігі. Олар кәріз желілерін қайта құру жобасының екінші кезеңін жүзеге асыруда. Желілердің жалпы ұзындығы 10 шақырымнан асады. Кәріз желілерін реконструкциялау жобасын аяқтау жыл соңына жоспарланып отыр. Ал сумен қамтуды реконструкциялау жобасы биыл ішінара аяқталатын болады, жол төсемдерін толық қалпына келтіру жұмысы келесі жылы жүзеге аспақ.
Жағдайды бағамдаған аймақ басшысы басты мақсат – инженерлік инфрақұрылымды жаңарту кезінде тұрғындардың қауіпсіздігі мен өмір сапасына нұқсан келтірмеу екенін айтты.
– Халыққа қолайсыздық тудырмай, жұмыс істеуге болатын жерлерде жұмысты жалғастырыңыздар. Ал қалған учаскелерде жобаны түзеткенше тоқтатыңыздар. Жобаны жасаған маманды шақырып, қажет болса, сотқа беріңіздер, лицензиясынан айырыңыздар. Мұндай жұмысқа жол берілмейді. Егер тағы да тоқтап қалса, балалар мектепке, үлкендер жұмысқа, біреулер ауруханаға жете алмай қалуы мүмкін. Ең бастысы – жолды қалпына келтіріп, тұрғындардың жайлылығын қамтамасыз ету, – деді облыс әкімі Марат Сұлтанғазиев.
Нәтижесінде тұрғындардың ұсынысы ескеріліп, көшелер толық жабылмайтын болды. Жұмыс балама көшелерде құрылыс толық аяқталып, асфальт төселгеннен кейін ғана басталады. Сонымен қатар облыс басшысына кент тұрғындары тарапынан келіп түскен өтініштердің бірі ауыл ішіне саябақ салу еді. Боралдай кентінде саябақ салу жобасын әзірлеу және оған қажетті жер телімін заң аясында қарастыру аудан және округ әкіміне тапсырылды.
Бағдат ШОЙБАС
Іле ауданы
