Қонаев қаласында Қазақстан Республикасы Төтенше жағдайлар министрлігінің 30 жылдығына арналған салтанатты шара өтті. Мерекелік шара қаланың орталық алаңынан бастау алды.
Салтанатты жиында облыстық төтенше жағдайлар департаментінің туы әкелініп, Қазақстан Республикасының Мемлекеттік Гимні шырқалған соң, облыс әкімінің кеңесшісі Нұржан Құдайбергенов жиналған қауымды Төтенше жағдайлар министрлігінің 30 жылдық мерейтойымен құттықтады. Нұржан Кеңесұлы өрт сөндіру бөлімінің бөлімше командирлеріне, қызметкерлеріне, бөлім басшылары мен сала ардагерлеріне облыс әкімінің Алғыс хатын табыс етті.
Келесі кезекте облыстық төтенше жағдайлар департаменті ардагерлер кеңесінің төрағасы Мират Қабылов сөз алып, 30 жыл ішінде тілсіз жауды ауыздықтау, тағы басқа да төтенше жағдайлардың салдарын жоюға қазіргі ардагерлердің еңбек сіңіргенін атап өтті. Одан кейін мінберге шыққан «Элитстрой құрылыс компаниясы» ЖШС вице-президенті Лаура Орынбасарқызы 2 қызметкерге пәтер кілтін табыс етті. Одан кейін алаңда бас қосқан жұртшылық өрт сөндіру техникаларының және басқа да көліктер мен құрал-жабдықтар көрмесін тамашалады.
Облыстық төтенше жағдайлар департаментінің ұйымдастыруымен өткен салтанатты шара одан әрі қалалық Мәдениет үйінде жалғасын тапты. Жиналған көпшілік төтенше жағдай кезіндегі қызметтік міндетін атқару кезінде қаза болған құтқарушыларды бір минут үнсіздікпен еске алған соң, алғашқы құттықтау сөз облыстық төтенше жағдайлар департаментінің бастығы, полковник Дәурен Оразбековке берілді.
– Бұл мереке – батырлық пен шынайы борыштың, адам өмірін сақтауға бағытталған адал қызметтің салтанаты. Сіздер – төтенше сәттерде тайсалмай, ел амандығы мен халық тыныштығы үшін аянбай тер төгіп жүрген қайсар да адал азаматсыздар. Әрбір құтқарылған өмір, аман қалған тағдыр – сіздердің ерлік пен жанқиярлық еңбектеріңіздің жемісі. Отыз жылдық тарих – кәсіби шеберліктің, табандылықтың, үздіксіз дамудың айғағы. Бүгінде Мемлекет басшысы, министр және облыс әкімінің қолдауымен заманауи техникамен, әуе көліктерімен, сапалы құрал-жабдықпен қамтамасыз етілуде, – деген департамент басшысы ардагерлердің мол тәжірибесі жас мамандар үшін баға жетпес мұра екенін, олардың ерлік пен адалдықтың үлгісін көрсеткенін баса айтты.
Сахна төрінде Дәурен Дәулетқанұлы сала ардагерлері мен қызметкерлерге «Төтенше жағдайлар министрлігіне – 30 жыл» мерекелік медалін табыс етті. Сонымен бірге облыстық төтенше жағдайлар департаментінің өрт сөндіру және авариялық-құтқару жұмыстарын ұйымдастыру басқармасының жедел кезекшісі Болат Махметұлы «Құтқарушы» төсбелгісімен марапатталды. Сонымен қатар бірқатар қызметкер мен ардагерлерге Қазақстан Республикасы Төтенше жағдайлар министрлігінің, облыстық төтенше жағдайлар департаменті бастығының Алғыс хаттары берілді.
Салтанатты шара соңы концерттік бағдарламаға ұласты.
Айжарық КӨПТІЛЕУОВ
