Жамбыл ауданының орталығы Ұзынағаш ауылындағы Мәдениет үйінде бос жұмыс орындары жәрмеңкесі өтті. Аталған шараның негізгі мақсаты – аудан тұрғындарын жұмыспен қамтуға ықпал ету, сол арқылы олардың әлеуетін арттыру.
Жұмыс орындары жәрмеңкесінде әсіресе жұмыссыз азаматтарға, оның ішінде жастарға, мүмкіндігі шектеулі жандарға басымдық берілді. Сонымен қатар пробация қызметінің есебінде тұрғандар мен бас бостандығынан айыру орындарынан босап шыққан азаматтарға да қолдау көрсету көзделді. Жәрмеңке барысында ауылдық округтердің мамандары, жұмыс берушілер мен мансап орталығының қызметкерлері және пробация қызметінің өкілдері қатысушыларға кеңес беріп, қолжетімді бос жұмыс орындары туралы ақпарат ұсынды. Сонымен қатар «Қазақстан Республикасының еңбек нарығын дамытудың 2024-2029 жылдарға арналған тұжырымдамасы» аясында қарастырылған бағдарламалар кеңінен түсіндірілді.
Жәрмеңкеге 25 жұмыс беруші келді. Атап айтқанда, аудан аумағында орналасқан өндіріс орындары, жекеменшік медициналық орталықтар, шаруа қожалықтары, сондай-ақ мемлекеттік және басқа да жекеменшік мекемелердің өкілдері қатысты. Шара барысында 80-ге жуық тұрақты бос жұмыс орны ұсынылды. Жәрмеңкеге жұмыссыз азаматтармен қатар, мүмкіндігі шектеулі жандар, алимент төлеушілер, пробация есебінде тұрғандар және бас бостандығынан айырылған азаматтар да тартылды. Нәтижесінде 70 адам кәсіби кеңес алды, ал бірқатар азамат жұмыс орнын тауып, 10 адам тұрақты жұмысқа орналастырылды.
Айта кетерлігі, бұл шара Еңбек күніне орай ұйымдастырылып, еңбек адамының қоғамдағы мәртебесін көтеру, еңбекке деген құрметті қалыптастыру мақсатын көздеді. Еңбек нарығындағы сұраныс пен ұсынысты тиімді ұштастыруға, азаматтарды тұрақты жұмыспен қамтуға және олардың әлеуметтік жағдайын жақсартуға бағытталды. Жәрмеңке азаматтарға жаңа мүмкіндіктер есігін ашып қана қоймай, еңбекке баулуға, қоғамға бейімделуге және тұрақты жұмыс табуға зор септігін тигізді.
Жамбыл ауданында халықты жұмыспен қамту бағыты басты назарда тұр. Жаңа жұмыс орындары бойынша жалпы биылғы жылға 8,5 мың жаңа жұмыс орындарын құру жоспарланған. Бүгінгі күнге 6,5 мың жаңа жұмыс орны ашылды. Тұрақты жұмысқа 3,6 мың адамды орналастыру жоспарланып, 2,7 мың азамат тұрақты жұмыспен қамтылды, ол 74 пайызды құрайды. Жыл аяғына дейін жоспар толығымен орындалады деп күтілуде. Оған осындай шараларды жүйелі өткізу септігін тигізуде.
Серік САТЫБАЛДИЕВ
Жамбыл ауданы
