Қарасай ауданындағы «Nur-Aman» спорт кешенінде еркін күрестен халықаралық дәрежедегі спорт шебері Ілияс Жұмайды еске алуға арналған ашық республикалық турнир өтті. Жарысқа еліміздің әр аймағынан және көршілес Қырғызстан, Өзбекстан, Тәжікстаннан 200-ден астам жас балуан қатысты.
Турнирдің ашылу салтанатында спорт саласының өкілдері Ілияс Жұмайдың спорттағы табандылығы мен еңбекқорлығына тоқталып, жеңісті сәттерін еске алды.
«Бұл жарыс – балуанға деген құрметтің белгісі. Кезінде спортшының ел мерейін үстем еткен жеңістеріне бәріміз куә болдық. Ол әлі де талай дүбірлі додаларда топ жарып, абыройымызды асқақтатар еді. Әттең, ғұмыры тым қысқа болды. Жиырмадан енді асқан шағында өмірден озды. Ілияс Жұмай атындағы бүгінгі турнир жас балуандардың әлемдік жарысқа шығуына жол ашады деп сенемін», – деді облыстық дене шынықтыру және спорт басқармасының басшысы Ақжүрек Таңатаров.
Айта кетейік, Ілияс Жұмай – еркін күрестен халықаралық дәрежедегі спорт шебері, жастар арасындағы Азия чемпионы, 23 жасқа дейінгі Қазақстан чемпионатының, сондай-ақ үш дүркін Олимпиада чемпионы Бувайсар Сайтиевтің жүлдесіне арналған беделді халықаралық турнирдің жеңімпазы. Оның есімі қазақ спортының тарихында мәңгі қалады.
«Биыл алғаш рет аталған жарыс республикалық деңгейге көтерілді. Одан да маңыздысы – жарыстың ашық мәртебесі көрші елдерден келген спортшылардың қатысуына мүмкіндік берді. Өзбекстан, Тәжікстан және Қырғызстандағы әріптестеріміз біздің шақыруымызды қуана қабылдады», – деді жарыстың бас төрешісі Қуаныш Ботабаев.
Үш күнге созылған турнир тартысты өтті. Жас балуандар 55 келіден бастап, 130 келіден жоғары 10 салмақ дәрежесінде бәсекеге түсті. Бозкілемдегі белдесулер жанкүйерлердің делебесін қоздырды. Қарсылас шақ келтірмеген спортшылар жеңіс тұғырына көтерілді. Жеңімпаздар мен жүлдегерлер медаль, кубок және ақшалай сыйлықтармен марапатталды.
Өз тілшіміз
Қарасай ауданы
