Бүгінде елімізде жүргізіліп жатқан реформалар ел Президенті Қасым-Жомарт Тоқаев айқындаған «Әділетті Қазақстан» тұжырымдамасымен тығыз байланысты. Бұл идея – қоғамның жаңаруын, азамат пен мемлекет арасындағы сенімнің нығаюын көздейді.
Мемлекеттік басқарудың жаңа мәдениеті енді халық үніне құлақ асу қағидатына негізделіп отыр. Мемлекеттік қызметтің басты мақсаты – азаматтарға әділ, сапалы және ашық қызмет көрсету. Президенттің айтуынша, мемлекеттік қызметшілер «Адам мемлекет үшін емес, мемлекет адам үшін» деген қағидатты берік ұстануы тиіс. Бұл қағидат жаңа кезеңнің мемлекеттік қызметшісіне қойылатын басты талапқа айналды.
ҚР Мемлекеттік қызмет істері агенттігінің төрағасы Дархан Жазықбай атап өткендей, «Адал азамат – ел тірегі, елдің арқа сүйері». Бұл ойдың астарында үлкен мән бар. Адалдық – тек жеке қасиет емес, ол мемлекеттің тұрақтылығы мен қоғам дамуының кепілі.
Әрбір мемлекеттік қызметші өз ісіне жауапкершілікпен қарап, ел мүддесін бәрінен биік қоюы қажет. Қызметтегі адалдық пен әділдік – қоғам сенімін қалыптастыратын ең маңызды фактор.
Бүгінгі заман мемлекеттік қызметшіден жоғары кәсібилікпен қатар ашықтық, коммуникация және заманауи технологияларды меңгеруді талап етеді. Бұрынғы бюрократиялық тәсілдердің орнына тиімді шешім қабылдай алатын, жаңашыл ойлайтын мамандар қажет.
ҚР Мемлекеттік қызмет істері агенттігі осы бағытта жүйелі жұмыс жүргізіп келеді. Біздің басты міндетіміз – жаңа сападағы адал әрі кәсіби мемлекеттік қызметші қалыптастыру. Ол үшін оқыту бағдарламалары жаңартылып, цифрлық құралдар енгізіліп, кадрларды іріктеу мен бағалау процесі ашық жүріп жатыр. Негізгі мақсат – қоғамда адалдық пен жауапкершілік мәдениетін орнықтыру. Егер әрбір азамат өз ісіне адал болса, мемлекеттік аппарат та сенімге ие болады.
Соңғы жылдары мемлекеттік қызметтердің басым бөлігі онлайн форматқа көшті. Бұл – ашықтықты арттырып, парақорлықтың алдын алу жолындағы маңызды қадам. Цифрландыру мемлекеттік басқаруды тиімді, ал шешім қабылдауды жедел етті.
«Әділетті Қазақстан» құру жолындағы басты қозғаушы күш – адал азаматтар. Адалдық, әділдік, жауапкершілік сынды құндылықтар мемлекеттік қызметшінің кәсіби болмысының өзегіне айналуы тиіс.
Біздің мақсатымыз – елге адал қызмет ететін, халықтың сенімін ақтайтын, жаңа дәуірдің талабына сай мемлекеттік қызметшілер қатарын көбейту. Өйткені елдің ең үлкен байлығы – өз ісіне адал азаматтар.
Нұрсұлтан СЕЙДАЛИЕВ,
ҚР Мемлекеттік қызмет істері агенттігі
Алматы облысы бойынша департаментінің басшысы
