Қарасай ауданындағы «Нұр-Аман» спорт кешенінде еркін күрестен көрнекті мемлекет және қоғам қайраткері, үш мәрте Социалистік Еңбек Ері Дінмұхамед Қонаевты еске алуға арналған республикалық турнир өтті. Аталған жарыста еліміздің әр өңірінен 2011-2012 жылдары туған жасөспірімдер бақ сынады. Барлығы 21 команда, 500-ге жуық спортшы қатысты.
Турнирдің мақсаты ел дамуына өлшеусіз үлес қосқан заңғар тұлға Дінмұхамед Қонаевтың есімін ұлықтау, жастар арасында еркін күресті насихаттау және жас балуандардың шеберлігін шыңдау болды.
Екі күнге созылған тартысты дода қорытындысы бойынша 10 салмақ дәрежесінде жеңімпаздар анықталды. Сайт Үшбаев (ШҚО), Дамир Салауат (Алматы қаласы), Мирас Әбдікәрім (Алматы облысы), Дінислам Меркібек (Жамбыл облысы), Мадияр Әбдікәрімов (Алматы облысы), Алмат Темірәлі (Алматы қаласы), Нұрислам Бадан (Жамбыл облысы), Батырхан Қарақыстақбай (Жамбыл облысы), Расул Мырзағали (Алматы қаласы) және Ұлан Сағарбек (Алматы облысы) бірінші орын иегерлері атанды.
Жеңімпаздар мен жүлдегерлер арнайы кубок, диплом, медаль және ақшалай сыйлықтармен марапатталды.
Өз тілшіміз
Қарасай ауданы
