Қонаев қаласының әкімі Асхат Бердіханов «POWERCHINA» компаниясының өкілдерімен кездесті.
«POWERCHINA» – Қытай Халық Республикасындағы мемлекеттік ірі компаниялардың бірі. Қазіргі таңда бұл серіктестік Қазақстанның түкпір-түкпірінде 23 түрлі жобаны іске асыруда. Оның қатарында гидроэнергетика, жылу энергиясы, кен өндіру, жол құрылысы секілді салалар бар.
Компанияның таныстырылымынан соң, қала әкімі облыс орталығының кешенді даму жоспары туралы баяндады. Аталған жоспар аясында 187 іс-шара жүзеге аспақ. Оның көбі инфрақұрылымды дамытуға бағытталған және «Жаңа Іле» аумағын игеру қарастырылған. Сондай-ақ алдағы уақытта 40 инвестициялық жобаны іске асыру көзделген. Жалпы Қонаев қаласына қызығушылық танытып отырған инвесторлардың қатары көп. Бұдан бөлек, қала әкімі Қонаевта мемлекеттік-жекеменшік әріптестік аясында жасалатын жобаларға лимит алынып тасталғанын да жеткізді. Компания өкілдеріне Қонаевта күн энергиясы стансасын салу мәселесін қарастыруды ұсынды. Сонымен бірге қалада әкімшілік нысандарын салу үшін инвестиция тарту көзделіп отырғанын айтты.
Кездесу соңында қала әкімінің орынбасары Төлеген Кенжебеков пен кәсіпкерлік бөліміне инвестициялық жобаларға талдау жасап, компаниямен тығыз қарым-қатынас орнату тапсырылды.
Ақерке Жұмағазықызы
Қонаев қаласы
