Облыс әкімінің бірінші орынбасары Қанат Есболатов қаржы саласының қызметкерлерін кәсіби мерекелерімен және Ұлттық валюта күнімен құттықтады. Бүгінгі таңда облысымыздың жеткен жетістіктеріне олардың қосқан үлесі зор екенін атап өтіп, жұмыстарына сәттілік тіледі.
– Биыл теңгенің қаржы нарығында айналымға еніп, егемен еліміздің темірқазығына айналғанына 32 жыл толды. Қаржыгерлердің ерен еңбегі, білімі мен білігінің арқасында өңір экономикасы қарқынды дамып келеді. Соңғы екі жылда ротациялық өңірлер арасында жиналған салық көлемі бойынша бірінші орындамыз. 2023 жылмен салыстырғанда түсім 120 млрд теңгеге өсіп, 130 пайызға орындалды. Бұл үрдіс биыл да жалғасуда. Соңғы үш жылда өңірдің жалпы өнімі 4,3 трлн теңгеден 6 трлн теңгеге өсіп, облыс республикада 9-дан 5-орынға көтерілді. Қаржы саласы қызметкерлерінің тиімді жұмысының нәтижесінде тұрақты экономикалық өсім сақталуда, – деген Қанат Болатұлы бірқатар қызметкерді марапаттады.
«Қаржы саласының үздігі» төсбелгісін Бибігүл Ұзақова, Ерлан Шатанов, Қаржы министрлігінің Алғыс хатын Ләззат Мүсірепова, Сымбат Сағындықова, Махаббат Қожабеков және өзге де қызметкерлер еншіледі. Ал Сәуле Батырбекова, Әлия Далбағаева, Сайрангүл Әбекенова және тағы басқа мамандарға облыс әкімінің Құрмет грамотасы табысталды.
Марапат иегері атанған облыстық қаржы басқармасының басшысы Бибігүл Ұзақова еңбегінің еленіп, құрметке бөленіп жатқанына қуанышты екенін айтты. «Қаржы саласында жұмыс істеп жатқаныма 25 жылдан астам уақыт болды. Алғашында жай ғана қызметкер болып бастағанмын. Ақырын жүріп, анық басып, осы дәрежеге де жеттік. Қоғамда қаржыгерлердің жұмысы көріне бермейді. Бірақ олардың атқарып жатқан істерінің маңызы зор. Бұл сала кішкентай қатені де кешірмейді, үлкен тиянақтылық, қадағалау керек. Әріптестерімді кәсіби мерекесімен құттықтаймын. Еліміздің дамуы үшін талмай еңбек етіп, табысқа жетулерін тілеймін», – деді ол.
Гүлзат БАЙҚОНЫСОВА
