Өңірлік коммуникациялар қызметінің ақпараттық алаңында өткен кезекті баспасөз мәслихаты балық аулау кезіндегі жазатайым оқиғалардың, адамдардың жарақаттануы мен өлімінің алдын алу шараларына арналды. Онда облыстық төтенше жағдайлар департаментінің бөлім бастығы, азаматтық қорғау полковнигі Самат Кенжехан баяндама жасады.
– Су айдынында қауіпсіздікті күшейту мақсатында ескерту тақтайшаларының санын ұлғайту туралы өңірдегі аудандар мен қалалардағы жауапты мекемелерге хаттар жолданды. Жұқа мұзға адамдардың баруын шектеу бойынша жұмыс жүргізілуде. Сондай-ақ балаларды қараусыз қалдырған ата-аналарды әкімшілік жауапкершілікке тарту мәселесі пысықталуда. Жыл басынан бері балық аулау кезінде адам өлімі тіркелген жоқ, – деген спикер қауіпсіздік ережелерін түсіндіріп өтті.
Айтуынша, мұз қалыңдығы тұщы суда кемінде 10 сантиметр және тұзды суда 15 сантиметр болғанда ғана балық аулауға болады. Көпір асты мен жылғалар құятын тұстарда, қамыс өскен жерлерде абай болу керек. Мықты мұз көк немесе мөлдір түсті болады. Ақ немесе күңгірт түс мұздың жұқа екенін білдіреді. Су айдынына жалғыз шығуға, жүгіріп, секіруге болмайды. Топ болып жүрген дұрыс, бірақ 4-5 метр арақашықтық сақталуы қажет. 10-15 метрлік арқан, ысқырық, таяқ немесе мұз ойғыш сияқты қауіпсіздік құралдарын сайлап шығу маңызды.
Гүлзат БАЙҚОНЫСОВА
