Қарасай ауданының Көксай ауылында ауыз толтырып айтарлық жиын өтті. Осы ауылдың тұрғыны, Екінші дүниежүзілік соғыстың куәгері, еңбек ардагері, марқұм Садыхан Дүйсембаевтың атына берілген көшенің ашылу рәсіміне жиналған халық қарасы көп болды.
Бұл дегеніңіз Жеңістің 80 жылдығына орай майдангерге көрсетіліп жатқан орасан құрмет екенін оны тірлігінде көзі көріп, жақсы қарым-қатынаста болған адамдар шара аясында кеңінен әңгімелеп, жеткізе айтты. Сонымен бірге жиынға қатысушылар көшенің майдангер атына берілуіне мұрындық болып, елеулі еңбек сіңірген Іргелі ауылдық ардагерлер кеңесінің төрағасы Егінбек Егеубековке ақ ниетті алғыстарын білдірді.
Шынында да ел басына күн туған соғыс сойқанының отты жылдарында Садыхан Дүйсембаев Мәскеу түбінде атты әскердің сапында болып, майданның алғы шебінен табылып, табандылығымен, талай ерлігімен көзге түседі. Жасаған ерліктері де ескерусіз қалмайды. Бірінші дәрежелі «Отан соғысы» орденімен, «Ерлігі үшін» медалімен, тағы да басқа да марапаттарға ие болады. Оқ пен оттың ортасында жүрген ол 1943 жылы бір қолынан жараланып, дәрігерлік комиссия анықтамасымен ІІІ топтағы мүгедек болып, еліне қайтарылады.
Туған ауылына оралған соң да майдангер қарап жатпайды. Шаруашылықтан шопан атаның ақ таяғын қолына алып, қой бағуды кәсібіне айналдырады. Еңбегі де нәтижесін бере бастайды. Мал басын аман алып қалумен қатар, төл алу мен жүн өндіру жоспарын да үнемі артығымен орындап отырады. Абыройы да асқақ болады. Садыхан Дүйсембаев 1969 жылы зейнеткерлік демалысқа шыққанға дейін қол үзбей қой бағумен айналысады. Құдайдың берген 80 жасында дүниеден өтеді.
Соғыс және еңбек ардагері Садыхан Дүйсембаев ұрпақсыз емес. Соңында бес баласы қалады. Қазір олар өз алдына түтін түтетіп, бір-бір үйдің тұтқасын ұстап отыр. Еңбектен де құралақан емес. Әрқайсысы өз кәсіптерімен айналысып, ата-аналарының немерелері мен шөберелерін аялы алақандарына салып, тәлімді тәрбиелерін беруде. Олар әкелерінің атына берілген көшеге дән риза болып, қалың қауымға арнайы ас беріп, халықтың алғысына да бөленді.
Қанат ТӘКЕБАЕВ
Қарасай ауданы
