Әкімдіктің мәжіліс залында облыстық мәслихаттың кезекті XLIIІ сессиясы өтті. Отырысқа облыс әкімінің орынбасары Рустам Исатаев, басқарма өкілдері, депутаттар, онлайн режимде қала, аудан басшылары мен мәслихат төрағалары қатысты.
Мәслихат төрағасы Қуат Байғожаев төрағалық еткен сессия отырысында алдымен қаралған мәселе – тұрғын үйді жалға алу бойынша өтемақы төлеу шаралары жөнінде облыстық экономика және бюджеттік жоспарлау басқармасы басшысының орынбасары Азамат Шәлдибеков баяндама жасады. Азамат Ғалымұлы өз сөзінде мемлекеттік қызметкерлерді баспанамен қамту басты міндет екенін айтты. Сол себепті де мемлекеттік органдардағы баспанамен қамтылмаған мамандарды қолдау мақсатында тұрғын үйді жалға алу бойынша өтемақы төлеу шараларын 2027 жылдың соңына дейін жалғастыру қажет екенін алға тартты.
Келесі кезекте ауызсумен қамту қызметінің құнына байланысты субсидиялау мәселесі қаралды. Бұл ретте облыстық энергетика және сумен жабдықтау басқармасы басшысының міндетін атқарушы Нұрлан Өмірханов биыл жаңартылған Су кодексі негізінде тұрғындар тұтынатын ауызсу құнының бір бөлігін субсидиялау тетігі көзделгенін жеткізді.
«Кодекс талаптарын іске асыру мақсатында ҚР Премьер-Министрінің 2025 жылғы 2 маусымдағы №87 өкімімен субсидиялау тетігін жүзеге асыру үшін қажетті құқықтық актілердің тізбесі бекітілді. Аталған тізбеде мәслихатпен бекітілуге жататын субсидияланатын су қамту жүйелерінен берілетін ауызсудың 1 текше метрі үшін төлем мөлшерін айқындайтын нақты тармақ қамтылған. Қазір Су кодексінің талаптарын орындау мақсатында Қазақстан Республикасы Индустрия және құрылыс министрлігі нормативтік-құқықтық актілерді қабылдады. Әдістеме негізінде облыстық энергетика және сумен жабдықтау басқармасы кешенді әлеуметтік-экономикалық талдау жүргізді. Талдау нәтижесі бойынша субсидияланатын ауызсудың 1 текше метрі үшін төлем мөлшерін 107 теңге деңгейінде белгілеу ұсынылды», – деді Су кодексі негізінде болып жатқан өзгерістерді түсіндірген Нұрлан Өмірханұлы.
Баяндаманы тыңдаған мәслихат депутаттары жобада халықты сумен қамтамасыз ету құнын төмендету мақсатында баламалы көздерден алынған ауызсуды субсидиялау көзделгенімен, жан-жақты саралаудың жеткіліксіз екенін айтып, мәселені келесі отырыста тыңғылықты түрде қайта қарауға шешім қабылдады.
Сессияда облыс әкімдігінің, облыс әкімдігі жанынан құрылған кәмелетке толмағандардың істері және олардың құқықтарын қорғау жөніндегі комиссияның, құқықбұзушылық профилактикасы ведомствоаралық комиссиясы мен әкімдік жанындағы терроризмге қарсы комиссияның дербес құрамдары бекітілді. Сонымен қоса облыстық бюджет комиссиясының құрамына және «Алматы облысы бойынша тексеру комиссиясы» мемлекеттік мекемесінің ережесіне өзгеріс енгізу туралы шешім қабылданды. Бұған қатысты ақпарат алдын ала қаралғандықтан, депутаттар бірауыздан қолдады.
Мәслихат төрағасы Қуат Сұлтанұлы кейбір мәселелер бойынша жауапты басқармалар өз ісіне атүсті қарап отырғанын жасырмады. Сонымен қоса кейбір сұрақтар бойынша тиісті органдар тарапынан қажетті келісім алынбаған жағдайда шешім тіркеуден өткізілмейтінін және заңды күшіне енбейтінін ескертті.
Сессияны қорытындылаған облыс әкімінің орынбасары Рустам Исатаев қабылданған шешімдердің маңызын тілге тиек етті. Ол аймақтың стратегиялық даму бағытын жүзеге асыруда әрбір шешімнің уақытылы әрі сапалы орындалуы басты шарт екенін атап өтті.
Ерзат АСЫЛ
