Облыстық әкімдіктің мәжіліс залында сыбайлас жемқорлыққа қарсы іс-қимыл мәселелері жөніндегі ведомствоаралық комиссияның кезекті отырысы өтті. Оған комиссия мүшелері, тиісті мемлекеттік органдардың басшылары, аудан және қала әкімдері онлайн режимінде қатысты.
Жиынды облыс әкімінің міндетін уақытша атқарушы Рустам Исатаев ашып, жүргізіп отырды. Күн тәртібінде полиция органдары мен ішкі саясат басқармасының және облыс әкімі аппаратының сыбайлас жемқорлыққа қарсы іс-қимыл шаралары туралы баяндамалары тыңдалды.
Ең алдымен облыстық полиция департаменті бастығының орынбасары Ұлан Садықов баяндама жасап, осы жылдың он айындағы сыбайлас жеқорлық тәуекелдеріне жүргізілген сыртқы талдау нәтижелерін жариялады. Оның айтуынша, басқарма аясында 151 қызметтік тексеріс жүргізіліп, 47 тәртіптік комиссия отырысы өткізілген. Барлығы 99 құжат қаралып, нәтижесінде 392 қызметкер тәртіптік жауапкершілікке тартылып, оның ішінде 47 қызметкер ішкі істер органдарынан шығарылған. Ұлан Ғабитұлының сөзінше, полиция департаментінде тәртіп пен заңдылықтың сақталуын күшейту, сыбайлас жемқорлықтың алдын алу және бақылау кешенді шаралары тұрақты түрде жүргізіліп келеді.
Жиында 2025 жылға арналған сыбайлас жемқорлыққа қарсы мәдениетті қалыптастыруға бағытталған әлеуметтік жобалардың іске асыру барысы да баяндалды. Облыстық ішкі саясат басқармасы басшысының міндетін атқарушы Медғат Қабдылқайыровтың айтуынша, биыл сыбайлас жемқорлыққа қарсы іс-қимыл шаралары аясында түрлі семинарлар мен кездесулер, шығармашылық байқаулар ұйымдастырылған. Олардың қатарында «Жас қылқалам иесі», «Әділдік бейнесі», «Ең креативті балапан», «Үздік идеялық шешім», «Қоғамға үн қатқан сурет», «Жастар көзімен әділ қоғам» сынды байқаулар бар. «Қазіргі таңда Алматы облысында «Сыбайлас жемқорлыққа қарсы көзқарас» атты облыстық сурет байқауы өтуде. Байқаудың басты мақсаты – балалар мен жастар арасында адалдық, әділдік және парасаттылық қағидаттарын шығармашылық тәсілмен жеткізу», – деді Медғат Көбегенұлы.
Қазақстан Республикасының сыбайлас жемқорлыққа қарсы саясатының 2022-2026 жылдарға арналған тұжырымдамасында сыбайлас жемқорлық тәуекелдерін, олардың туу себептерін анықтау айқындалған. Бүгінде облыста осы бағытта жүйелі жұмыс атқарылуда. Облыс әкімі аппаратының құқық қорғау органдарымен жұмыс бөлімінің басшысы Сағынай Мұсағитовтың айтуынша, қараша айына дейін 3 ведомствоаралық комиссия отырысы өткізіліп, 13 мәселе қаралған, 34 ұсыным әзірленген. Сонымен қоса «Сыбайлас жемқорлыққа қарсы мәдениетті нығайту» жоспары аясында 600-ден астам іс-шара өткізіліп, 7 мыңнан астам адам қамтылған. «Жыл басынан бері 45 ішкі сыбайлас жемқорлық тәуекелдеріне талдау жүргізіліп, 35 жағдай анықталды, 15-і жойылды, 20-сы бойынша жұмыс жүргізілуде. Ішкі талдаудың нәтижелері мемлекеттік органдарға тән типтік сыбайлас жемқорлық тәуекелдерінің бар екенін көрсетеді. Кейбір жағдайларда сыбайлас жемқорлыққа қарсы іс-шаралар тиімді емес және формалды түрде ұйымдастырылуда. Осы орайда, ұсынылған ақпаратқа сәйкес, мұндай көріністер облыстық білім басқармасында және Балқаш ауданы мен Алатау қаласының әкімдіктерінде байқалады», – деді Сағынай Амангелдіұлы.
Рустам Исатаев сыбайлас жемқорлықпен күрес баршаға жүктелетін жауапты міндет екенін тілге тиек етті. Осыған байланысты мемлекеттік органдарға бірқатар тапсырма жүктеді.
– Қабылданып жатқан шараларға қарамастан, білім беру, денсаулық сақтау, жер қатынастары, агроөнеркәсіптік кешенді субсидиялау салаларында сыбайлас жемқорлық тәуекелдері әлі де сақталып отыр. Бұл аталған салаларда алдын алу жұмыстары формалды түрде жүргізіліп жатқанын білдіреді. Алға қойылған мақсатқа жетуде алдымызда үлкен міндет тұрғаны белгілі. Бізге формалды есептер қажет емес, нақты нәтижелер керек, – деді отырысты қорытындылаған Рустам Маратұлы.
Ерзат АСЫЛ