Алматы облысына іссапармен келген ҚР Еңбек және халықты әлеуметтік қорғау министрі Светлана Жақыпова Қарасай жеріне де атбасын бұрды. Ауданға келудегі басты мақсаты – «Сәуле Сапар» оңалту және дамыту орталығының жұмысымен танысу.
Светлана Қабыкенқызы алдымен орталық ғимаратын аралап көрді. Министрді аталған орталықтың негізін қалаушы Сәуле Рахымжанова қарсы алып, ерекше балаларды дамыту бағытында атқарылып жатқан жұмыстармен таныстырды.
Министр оңалту орталығының нәтижелі жұмысын оң бағалады. Психолог, логопед-дефектолог, емдік жаттығумен айналысатын және басқа да білікті мамандардың еңбектеріне тәнті болып, ерекше балалардың қадам басуға деген құштарлығын көріп, өнерге деген ұмтылысын байқады. Сондай-ақ бүлдіршіндердің шат-шадымен көңіл-күйлеріне ортақтасып, жылы лебізін де білдірді.
Кездесу барысында «Сәуле Сапар» қоғамдық бірлестігінің дамуына қатысты мәселелер де талқыланды. Мекеме өкілдері әрбір баланың жаттығуына, дамуына қатысты үкіметтік емес ұйымға бекітілген стандарттарға өзгеріс енгізілсе деген ұсыныстарын білдірді. Мәселен, құқықтық нормаға сәйкес әр баланың тиісті шаршы метр бойынша төсек-орны болуы тиіс. Ал бұл талап әзірге бұл ғимараттың жағдайына сай келмей тұр. Осы сынды басқа да сұрақтар ортаға салынды.
Светлана Қабыкенқызы бұл ұсыныстардың бәрі ескерілетінін айтып, қазіргі уақытта осындай оңалту орталықтарына қойылған талаптар қайтадан зерделеніп жатқанын түсіндірді. Алдағы уақытта үкіметтік емес ұйымдарға лицензия беру тәртібі де, стандарт құқықтары да өзгеретінін алға тартты. Сондай-ақ ведомство басшысы бұл мекемеде нәтижелі істер атқарылып жатқаны көрініп тұрғанын ерекше атап өтіп, алдағы уақытта осы қарқынмен жұмысты жалғастыру қажеттігін айтты. Мамандардың да біліктіліктерін арттыруды ұмытпау керектігін, өйткені олардың білімді, жан-жақты болуы баланың дамуына жұмсалатынын айрықша жеткізді.
Айта кетер болсақ, талай мүмкіндігі шектеулі балаларға үміт сыйлап отырған «Сәуле Сапар» оңалту орталығына үкіметтік емес ұйым ретінде тіркеліп, ресми түрде жұмыс істеп келе жатқанына үш жылдай уақыт болып қалды. Осы уақыт аралығында мұнда жүру мүмкіндігінен үміт үзгендердің біразы аяқтарына нық тұрып, қадамдарын сеніммен басып келеді. Сондай-ақ ерекше бүлдіршіндердің тірек-қимылдары қатайып, өнерге деген құштарлығы артуда.
Бүгінгі таңда мұнда әлеуметтік қызмет көрсету бағдарламасы арқылы 125 бала тегін ем қабылдайды. Ал олармен 25 білікті маман жұмыс істеп, әр баланың дамуы жолында табандылық танытуда.
Қуат ҚАЙРАНБАЕВ
Қарасай ауданы
