Өрттің алдын алу – әрбір азаматтың міндеті. Тұрғын үйлерде болсын, өндірістік немесе әлеуметтік нысандарда болсын, қауіпсіздік талаптарын сақтау өте маңызды. Осы орайда Қонаев қалалық төтенше жағдайлар басқармасының инженері, азаматтық қорғау аға лейтенанты Махамбет Маратұлы «Өлке тынысы» ЖШС қызметкерлерімен жүздесіп, өрт қауіпсіздігі жайында сөз қозғады.
Тілсіз жаудың алдын алу үшін қауіпсіздік ережелерін қатаң сақтауға шақырған басқарма инженері ғимарат ішінде кенеттен қызыл жалын пайда болған жағдайда оны ауыздықтау үшін өрт сөндіруге арналған құрал-жабдықтарды қалай қолдану керегін айтып, іс жүзінде көрсетіп берді.
– Ең алдымен эвакуациялық жолдар мен шығу есіктері ашық болуы керек. Оларды жабуға немесе алдына заттар қойып, бөгеп тастауға болмайды. Міндетті түрде өрт сөндіргіштер, гидранттар, құм салынған жәшіктер толық, жарамды күйде және қолжетімді жерде болуы қажет. Электр жабдықтарын пайдалану кезінде нұсқаулықтың қатаң сақталып, зақымдалған сымдар уақытында ауыстырылып, жанғыш материалдар арнайы белгіленген орындарда сақталып, ашық от көздерінен аулақта болуы керек. Тұрғын үйлердегі өрттің басым бөлігі электр құралдарының дұрыс пайдаланылмауы және абайсыздық салдарынан болады. Оның алдын алу үшін үйде электр желілерінің жарамдылығы тексеріліп, газ плитасы қосылған күйі қалмауы қажет. Сіріңке, оттық сияқты заттар балалардың қолы жетпейтін жерде сақталуы тиіс. Қатты отынмен жылытылатын үйлердегі пештің мұржасын уақытында тазалауды, жанып жатқан пешті қараусыз қалдырмауды естен шығармаған жөн. Өрт туындаған кезде бірден 102 немесе 112 нөміріне қоңырау шалып, түтін қоюланған жайдайда еңкейіп немесе еңбектеп қауіпсіз жерге шығу керек. Шағын өртті өрт сөндіргіш құралмен ауыздықтауға болады. Өрт сөндіргіш құралын қолдану үшін ең алдымен оны шайқап алып, үстіндегі қауіпсіздік түйреуішін тартып шығарып, тұтқасын басып, жанып жатқан нысанаға 1-2 метр қашықтықтан бағыттайды. Өрт толық сөнгеніне көз жеткізбейінше, жалынға жақындамау керек, – деді Махамбет Маратұлы. Сондай-ақ маман өртті дер кезінде ауыздықтауда көмірқышқыл газын анықтайтын арнайы құрылғының да көмегі зор екенін айта кетті. Өрт көп жағдайда адамдар ұйықтап жатқан түнгі уақытта орын алады. Осы кезде дабыл беретін арнайы құрылғының арқасында қайғылы жағдайлардың алдын алуға болады. Осы орайда әкімдік тарапынан 70 құрылғы (датчик) бөлінгенін алға тартқан инженер сезгіштігі жоғары бұйымдар қарт кісілер, аз қамтылған, көпбалалы отбасылар, мүгедектігі бар жандардың үйіне тегін орнатылып жатқанын да жеткізді.
Тоғжан ЖОЛДЫҒАЛИ
