«Таза Қазақстан» республикалық экологиялық акциясы аясында Балқаш ауданы Бақбақты ауылының орталығындағы Алтынбай Сәтбаев атындағы саябаққа 100 шырша, 100 ақ қайың және 100 түрлі басқа да ағаш көшеттері отырғызылды.
Ауыл тұрғындарының демеушілігімен ұйымдастырылған іс-шара барысында жастар ерекше белсенділік танытты. Осы орайда Балқаш ауданының Құрметті азаматы, «Құрмет» орденінің иегері, ардагердің ұрпағы Сапарғали Сәтбаев аталмыш саябақтың абаттануына қолдау көрсеткен ауыл тұрғындарына ризашылығын білдіріп, ағаш көшеттерін отырғызуға атсалысқан жас буын өкілдеріне «Жұлдыздарың жарық болсын!» деген ақ батасын берді.
Сенбілік соңында ауыл әкімі Ермек Өнербеков: «Ауылдың болашағы –бүгінгі жастардың қолында. Осындай игі шараларға үнемі атсалысып, ауылды көркейту жұмысын бірлесіп атқарайық», – дей келе, акцияға белсене қатысқан жастарға алғысын жеткізді.
Саябақта алуан түрлі ағаш пен көздің жауын алатын гүлдер жайқалып өссе, ауыл көркін ажарландыра түседі. Мұнда келген адамдар таза ауада еркін тыныстап, көтеріңкі көңіл-күйде демалып қайтады. Аталмыш саябаққа жуырда соғыс және еңбек ардагері Алтынбай Сәтбаевтың есімі берілгелі бері бұл жер ардагер ұрпағының қолға алуымен гүлденіп келеді. Оған нақты дәлел акция аясындағы осындай іс-шаралар десек болады.
«Жұмыла көтерген жүк жеңіл» демекші, бақбақтылықтардың бұл қолға алған жұмысы – ауыл тұрғындарының ауызбіршілігінің арқасында жүзеге асқан игі бастама. Акция аясында атқарылған бұл іс өзгелерге үлгі боларлық.
Бақтығали ДӘУІТБАЕВ
Балқаш ауданы
