«Таза Қазақстан» экологиялық акциясы аясында «Алматы – Қонаев» тасжолы бойында сенбілік өтті.
Жыл басынан бері облыс бойынша акцияға 800 мыңға жуық адам, 8836 кәсіпорын мен ұйым қатысып, 4 мыңға жуық техника жұмыс істеген. 11 мың тоннадан астам қоқыс жиналған. Сондай-ақ 109,8 мың ағаш егіліп, 3 048 көпқабатты тұрғын үйдің ауласы, 55 саябақ пен сквер, 1090 тарихи-мәдени ескерткіш және 1055 әлеуметтік нысан тазартылған.
– «Таза Қазақстан» республикалық экологиялық акциясы аясындағы іс-шаралар жоспарға сәйкес орындалуда. Онлайн-платформа арқылы да жұмыс жүргізіліп келеді. Бүгінгі күнге дейін Telegram-ботқа 1123 өтініш келіп түсті, оның 880-і орындалды, 233-і кері қайтарылды, ал 10-ы орындалу үстінде. Бұл – осы жылғы соңғы сенбілік. Ауа райының қолайсыздығына байланысты тазалық жұмыстарын келесі жылы жалғастыратын боламыз, – деді облыстық тұрғын үй-коммуналдық шаруашылық және абаттандыру басқармасы көгалдандыру және абаттандыру бөлімінің басшысы Бекзат Кәрімов.
«Әріптестерімізбен мұндай шаралардан қалыс қалған емеспіз. Еліміздің таза болуына әрбір азамат үлесін қосуы керек», – деді шараға қатысқан Ермек Ибрагимов. Жер ресурстарын басқару департаментінің қызметкері Айжан Асқар сенбілікке қызымен бірге келген. «Айлин сенбілікке қатысуды өзі қалады. Жас ұрпақ табиғатты қорғау керегін кішкентайынан түсініп, осындай істерге қатысу маңызды екенін ұғынып келеді. Қызымның көмектескісі келген ниетін мақтан тұтамын», – деді ол.
Гүлзат БАЙҚОНЫСОВА
