Кеген ауданы Алғабас ауылында Оқу ісінің үздігі Кеңесбек Молдабаевты еске алуға арналған ардагерлер арасында волейбол жарысы өтті.
Турнирдің ашылу салтанатында аудандық дене шынықтыру және спортты дамыту орталығының директоры Гайдар Мұқанқожаев ұлағатты ұстаздың еңбегіне тоқталып, қатысушыларға сәттілік тіледі.
Кеңесбек Қарсыбекұлы білім саласында үзіліссіз 58 жыл еңбек етті, оның 35 жылын мектеп басқару ісіне арнады. Республикалық газет-журналдарда штаттан тыс тілші болып жұмыс істеді. Көптеген мақала мен очерктері жарияланған. Ол бала тәрбиесі, ауылдың ахуалы, еңбек адамы сияқты маңызды тақырыптарға баспасөз бетінде қалам тербеді.
Жарысқа қатысушылар жеребе арқылы топқа бөлініп, бақтарын сынады. Турнир қорытындысы бойынша бірінші орынды Кеген ауылының спортшылары жеңіп алды, екінші орынды Алғабастың ардагерлері иеленді, ал үшінші орын Жылысай командасына бұйырды.
Жеңімпаздар мен жүлдегерлерге дене шынықтыру және спортты дамыту орталығының дипломы, медалі, кубогы және бағалы сыйлықтар табысталды. Талғат Кеңесбекұлының әулеті жарысқа қатысқан спортшылар мен қонақтарға алғыс білдірді.
Осылайша, салауатты өмір салтын насихаттап, аға буынның өнегелі өмір жолын жастарға үлгі ету мақсатында өткен турнир өз мәресіне жетті.
Дәурен ӘБУТӘЛІПОВ
Кеген ауданы
