Кеген ауданы Тасашы орта мектебі жанындағы интернатта қазақ халқының ағайындық, бауырмалдық, үлкенді сыйлау дәстүрін насихаттау, оқушыларды бірлікке, мейірімге, ауызбіршілікке тәрбиелеу, отбасындағы аға рөлінің маңызын түсіндіру, үлкенге құрмет, кішіге ізет мәдениетін қалыптастыру мақсатында «Ағасы бардың – жағасы бар» атты тағылымды кеш өтті.
Шараға Кеген аудандық мәслихат төрағасы Алмасбек Нұғыман, Тасашы ауылының әкімі Ерболат Төребаев, мектеп директоры Нұргүл Қырықбайқызы, интернат тәрбиеленушілері мен ұстаздар қатысты. Іні мен қарындасы ағасына қарап бой түзейді, арқа тұтады. Ал қазіргі таңда балалар аға қамқорлығын көріп жүр ме? Ағаның ең басты міндеті қандай деп ойлайсыз? Осындай сұрақтар төңірегінде балаларға кеш қонақтары тұшымды жауап қайтарды.
Аудандық мәслихат төрағасы Алмасбек Нөкербанұлы:
– Отбасында ағаның атқаратын міндеті зор. Ол өзінен кейінгі іні-қарындасына дұрыс жол көрсете білуге тиіс. Сонда ғана жасы кішілер оны өнеге тұтады. Айтқан ақылын тыңдайды. «Ағасы бардың – жағасы бар» деген сөз тәлімі мол жандарға қаратып айтылған, – дей келе, жас ұрпақтың әуелгі ата-ана, ұстаз тәрбиесін алу, көп ізденіп, көп оқу керектігін тілге тиек етті.
Аталған шарада 8-сынып оқушысы Серікбек Бижамал «Ағам бар менің» әнін орындаса, 7-сынып оқушысы Әли Қайрат ақиық ақын Мұқағали Мақатаевтың өлеңдерін оқыды.
Кездесу барысында ауыл әкімі Ерболат Төребаев жастардың бойына рухани құндылықты сіңіру, үлкенді сыйлау, кішіге құрмет көрсету жайында ағалық кеңесін айтса, мектеп директоры Нұргүл Қырықбайқызы өмірлік тәжірибесімен бөлісіп, жас ұрпаққа өнеге берер әсерлі әңгімелерін ортаға салды.
Интернат меңгерушісі Құралай Оқасова кездесу кешін қорытындылап, алдағы уақытта мұндай игі шаралар жалғаса беретінін жеткізді.
Дәурен ӘБУТӘЛІПОВ
Кеген ауданы
