Жамбыл ауылдық Мәдениет үйінде Ауыл шаруашылығы, тамақ және қайта өңдеу өнеркәсібі қызметкерлері күні аталып өтті. Салтанатты шараға өңір еңбеккерлері мен сала мамандары қатысып, ауыл шаруашылығында қол жеткен жетістіктер мен алдағы межелерді саралады.
Мәдениет үйінің кіреберісіне ауыл шаруашылығы өнімдерінің көрмесі қойылды. Мұнда шикізатты ұқсату өндірісінің жұмысы айқын көрініс тапты. Одан кейін көрермен залында салада атқарылған жұмыстың нәтижесі кеңінен сөз болды. Алдымен аудан әкімінің орынбасары Азамат Сұлтанов ауыл шаруашылығының бір жыл бойғы жұмысының есебін берді. Баяндамада саланың қарқынды дамып келе жатқаны, соңғы жылдары аудан экононикасы тұрақталып, аграрлық сектордағы жұмыс біршама жақсарғаны нақты көрсеткіштермен келтірілді.
Баяндамада жыл басынан бергі ауыл шаруашылығы өнімінің жалпы көлемі 67 млрд теңгеге жеткені айтылды. Бұл көрсеткіш ауданды облыстағы алғашқы үштіктің қатарына шығарады. Ал мал саны бойынша бұл аймақ көш бастап тұр. Облыстағы 2 жарым млн малдың жартысына жуығы Жамбыл ауданында тіркелген. Атап айтқанда, мұндағы қой-ешкі саны қазір 1 млн 200 мыңға жетті. Сонымен қатар 114 мың бас ірі қара, 57 мың бас жылқы бар. Облыста тіркелген 8 мың бас түйенің 1 жарым мыңы осында. Саланы мемлекеттік қолдаудың нәтижесінде өнім өндіру мен қайта өңдеу саласында оң өсім байқалады. Жыл басынан бері 15 мың тоннаға жуық ет, 32 мың тонна сүт, 77 миллион дана жұмыртқа өндірілді. Биыл диқандар 103 мың тоннадан астам астық бастырып, бидай, арпа, жүгері мен сұлы өнімдерін алды. Сондай-ақ 30 мың тонна көкөніс жиналды. Аграрлық секторды қолдау мақсатында «Ауыл аманаты» бағдарламасы аясында 8 шаруашылық қолдауға ие болды. Нәтижесінде грант иегері атанып, кәсібін жүргізіп отырғандар қатары өсе түсті.
Ауылшаруашылық техникасын жаңарту ісі де жүйелі жүргізілуде. Сондай-ақ 22 мың гектар суармалы алқаптың жартысы тамшылатып және жаңбырлатып суару жүйесін пайдаланады. Қысқа дайындық ойдағыдай. Биыл 1 миллионнан астам мал қыстатылмақ. Ол үшін 535 мың тоннадан астам мал азығы дайындалған. Мал ұрлығына қарсы шара ретінде биылдан бастап малды таңбалау және тіркеу жұмысы жүргізіліп жатыр. Жиында саладағы жұмыстың бұдан басқа да қырлары жан-жақты сөз болды.
Шара барысында «Аграрлық несие корпорациясы» акционерлік қоғамының облыс бойынша филиалы директорының орынбасары Нұрмәди Әлібаев тауар өндірушілерге ұсынылатын мемлекеттік қолдау шаралары туралы айтты. Келесі кезекте мінбеге көтерілген шаруашылық жетекшілері тәжірибелерімен бөлісті. Бұл орайда Үңгіртас ауылдық округінің аумағында орналасқан «Хеппи Фарм» сүт-тауарлы фермасының меңгерушісі Ернар Мөрлібаев, Шиен ауылындағы «Жахангер» шаруа қожалығының басшысы Ғабит Әбуов шаруа жайымен таныстырды.
Жамбыл ауданының әкімі Нұрлан Ертас сала еңбеккерлері мен мамандарын кәсіби мерекемен құттықтап, ауыл шаруашылығын дамытуға өзіндік үлесін қосқан біраз азаматқа салтанатты жағдайда марапат тапсырды. Мұндай құрметке шаруа қожалықтарының төрағалары, малшы, механизатор, мал дәрігері, агроном, техник-ұрықтандырушы, сонымен қатар ауыл әкімдері мен бөлім қызметкерлері ие болды. Оларға сахна төрінде ҚР Ауыл шаруашылығы министрлігі мен облыс, аудан әкімінің Құрмет грамоталары, «АМАNАТ» партиясы облыстық филиалы мен аймақтық кәсіпкерлер палатасының Алғыс хаттары табысталды. Еңбегімен ерекшеленгендердің қатарында Қарабастау ауылынан Асхат Болатұлы, Шолаққарғалы елдімекенінен Көркем Белгібаев, аққайнарлық Абай Құнанбайұлы, Қарасу округінен Әділбек Аманов, Жамбыл ауылынан Дастан Өтембаев, Ақсеңгір елдімекенінен Жұмахан Дүкеев, дегерестік Ерсін Әбішов, Самсыдан Айдар Зәкіров, Ұзынағаш округінен Талғат Қалиев сияқты шаруа қожалық басшылары, аудандық ауыл шаруашылығы бөлімінің мамандары, сондай-ақ Бозой және Үңгіртас ауылдық округтерінің әкімдері Торғын Бейсембаева мен Дәурен Әбдуәли және басқа да азаматтар бар.
Жиын соңында ауыл шаруашылығы, тамақ және қайта өңдеу өнеркәсібі қызметкерлерінің құрметіне аудандық «Сүйінбай сазы» халықтық фольклорлық-этнографиялық ансамблі концерт қойды.
Серік САТЫБАЛДИЕВ
Жамбыл ауданы
