Кеген ауданы Жылысай ауылындағы М.Орманов атындағы орта мектептің спорт залында «Ерен еңбегі үшін» төсбелгісінің иегері, Қазақстанның «Алтын кітабына» енген ардагер-спортшы Есенаман Мергенбайұлының 70 жасқа толуына орай волейбол жарысы өтті.
Турнирдің ашылу рәсімінде Кеген аудандық дене шынықтыруды және спортты дамыту орталығының директоры Гайдар Әріпбайұлы, Кеген аудандық «AMANAT» партиясы филиалының төрағасы Олжас Тақабаев құттықтау сөз сөйледі.
– Елдің бірлігі мен ынтымағын ойлаған, келешекке өшпес өнеге қалдыруды мақсат тұтқан аға буынның игі істері жетерлік. Ардагерлер өнерде де, спортта да белсенді, – деді Олжас Маратұлы.
Жарысқа қатысушылар жеребе арқылы топ-топқа бөлініп, бақ сынады. Турнир қорытындысы бойынша волейбол жарысында сынға түскен 8 командадан 1-орынды Кеген ауылының спортшылары жеңіп алса, 2-орынды жылысайлық ардагерлер иеленді. Ал 3-орын Ұзынбұлақ командасына бұйырды. Бұдан бөлек, топтан оза шапқан ойыншылар да жүлдеден құр қалмады.
Жеңімпаздар мен жүлдегерлерге аудандық дене шынықтыруды және спортты дамыту орталығының Алғыс хатын, диплом, медаль, кубок және бағалы сыйлықтар табысталды. Мерейтой иесі Есенаман Мергенбайұлы әулет атынан спортшылар мен ұйымдастырушыларға алғысын білдірді.
Осылайша, салауатты өмір салтын насихаттаған турнир өз мәресіне жетті.
Дәурен ӘБУТӘЛІПОВ
Кеген ауданы
