Қазақстан мен Корея арасындағы мәдени байланыс 1991 жылы Алматыда Корей білім беру орталығының құрылуынан бастау алған болатын. Соңғы 20 жылдағы бірлесіп ұйымдастырылған концерт, көрме, театрлық қойылым, ғылыми конференция, сән үлгілерін көрсету, Қазақстанның өнер мен бұқаралық ақпарат саласы қызметкерлерін Кореяға шақыру сияқты шаралар екі ел арасындағы халықаралық ынтымақтастықтың жаңа деңгейге көтерілуіне ықпал етті.
Қазақстан халқы Ассамблеясының 30 жылдығына орай Қазақстан-Корей мәдениетінің тәжірибе алмасу күні аясындағы Қонаев қалалық Мәдениет үйінде өткен достық шарасы – соның бір айғағы. Мақсаты – Қазақстан халқына дәстүрлі және қазіргі заманғы Корей мәдениетімен жеке танысуға мүмкіндік беру, олардың Кореяға деген түсінігі мен қызығушылығын арттыру.
Шараны ашқан Қонаев қаласының әкімі Асхат Бердіханов қазақ-кәріс мәдени байланысы әртүрлі халықтардың салт-дәстүрі мен әдет-ғұрпының бір-бірін байытып, толықтыра алатынының жарқын мысалы екенін атап өтті. Осындай бірлескен мәдени шаралар арқылы екі халықтың достығы нығайып, құндылықтары дәріптелетінін тілге тиек еткен шаһар басшысы Корей Республикасының Алматы қаласындағы Бас Консулы Хэ Тэ Ук пен Оңтүстік Кореядағы «Ханин Ильбо» газетінің бас редакторы Ким Сан Уктің иығына шапан жапты.
Келесі кезекте Корей Республикасының Алматы қаласындағы Бас Консулы Хэ Тэ Ук сөз алып, кәріс халқының жапон отаршыларына қарсы күресіп, бостандыққа қол жеткізгеніне 80 жыл толып отырғанын айта келе, жиналған қауымды тарих пен бүгінгі күн арасындағы алтын көпір іспетті мюзиклді тамашалауға шақырды.
Сахнада драма, опера, эстрада, хореография секілді өнер түрлерінің басын біріктіретін музыкалық-сахналық қойылым азаттықты аңсаған кәріс халқының тарихынан сыр шертті. Онда халықтың тәуелсіздік үшін күрескен батырларының қаһармандығы мен сол жолда жанын пида еткен ерлерінің ерлігі баяндалды. Сондай-ақ 1937 жылы «Жапон тыңшысы» деген желеумен Қиыр Шығыстан күштеп қоныс аударылған кәрістердің сол қиын-қыстау кезеңдегі тартқан тауқыметі жайлы бейнефильм көпшілік назарына ұсынылды.
Айжарық КӨПТІЛЕУОВ
