Талғар аудандық Мәдениет үйінің мәжіліс залында «Ерекше жүрек – ерекше еңбек» атты сән көрсетілімі өтті. Аталған шараны «Ұлттық құндылық» орталығы облыстық жұмыспен қамтуды үйлестіру және әлеуметтік бағдарламалар басқармасының қолдауымен ұйымдастырды.
Бірлік ауылында ерекше балаларды тәрбиелеп отырған аналарды қолдау үшін «Ұлттық құндылық» орталығы ашылған. Мұнда балалар мен аналар өздерін жан-жақты дамытуға септігін тигізетін әртүрлі бұйым жасайды. Орталық жетекшісі Зухра Серікқызы сән көрсетіліміне қатысқан аналарға шын жүректен алғыс айтты.
– Бүгінгі шара – сіздердің жұмыстарыңыздың нәтижесі ғана емес, қоғамдық өмірге белсене араласып, мейірімге мұқтаж балаларға қамқорлықты да қатар алып келе жатқан еңбектеріңіздің айғағы, – деді ол.
Кездесуде облыстық еңбек мобильділігі орталығының директоры Абылай Зуайда да қатысушыларды құттықтап, олардың балалар игілігі жолындағы сауапты ісін айрықша атап өтті.
– Мемлекеттік бағдарламалардың арқасында сіздерге қолдау көрсетіп, бірлескен іс-шараларды тұрақты түрде жүзеге асырып келеміз. Біздің қоғамда еңбек адамы әрдайым құрметке лайық, соның ішінде ерекше бала тәрбиелеп отырған аналар еңбегі ерен, – деді Абылай Жұмабекұлы.
Шара соңында сән көрсетілімінің қорытындысы шығарылып, орталықта жұмыс істейтін жүрегі мейірімге толы барлық аналар Құрмет грамотасы және бағалы сыйлықтармен марапатталды.
Құтмағамбет ҚОНЫСБАЙ
Талғар ауданы
