Ел басына күн туған сындарлы сәтте қан майданға аттанып, Отан қорғау жолында жан қиған аталарымыздың ерлігі – ұрпаққа өнеге. Кеген өңірінің жұртшылығы майдангерлер рухына тағзым етіп, олардың есімін кейінгі буынға насихаттап келеді. Жуырда тағы бір тағылымды шараның куәсі болдық. Қарқара ауылындағы бір көшеге ерлігі ел есінде қалған «Еңбек Ері» медалінің иегері, соғыс ардагері Әжі Қайыровтың есімі берілді.
Әжі Қайыров жауынгерлік сапта жүріп, туған жерінің бостандығы үшін жан аямай шайқасты. Ол 1903 жылы 5 ақпанда Кеген ауданы Қарқара (бұрынғы Құмтекей) ауылында дүниеге келген. Жастайынан еңбекке араласып, ауыл шаруашылығында жұмыс істеп, үлкендердің тәлім-тәрбиесін алды. Оның бойындағы еңбекқорлық пен табандылық кейіннен соғыс жылдарында да көрініс тапты. 1941 жылы әскерге шақырылып, 92-атқыштар полкінің құрамында Сталинград шайқасына қатысқан. Бұл шайқас тарихтағы ең ауыр әрі шешуші кезеңдердің бірі еді. Сол жылдары ол тек жауынгер ғана емес, батылдығымен көзге түскен көшбасшы болды. Соғыстан жараланып елге келген қазақ сарбазы ауылдастарының алдында үлкен құрметке ие болып, шаруашылық жұмыстарына белсене араласады. Тың жерлерді игергені үшін «Еңбек Ері» медалін иеленді. Оның әрбір ісі ауыл тұрғындарына үлгі болып, жастарды еңбек етуге шақырып, өңірдің әлеуметтік-экономикалық дамуына зор үлес қосты. Соғыста көрсеткен ерлігі үшін Жеңістің 20, 30, 40 жылдық медальдарымен, «КСРО Қарулы Күштерінің 50 жылдығы» медалімен және ІІ дәрежелі «Отан соғысы» орденімен марапатталды.
Дәурен ӘБУТӘЛІПОВ
Кеген ауданы
