Жамбыл ауылындағы өнер мектебінде «Тәуелсіздік – мәңгілік елдің тұғыры» атты тағылымды кездесу өтті. Шараның мақсаты – Тәуелсіздіктің қандай үлкен күрес пен қайсарлықтың арқасында келгенін өскелең ұрпақтың санасына сіңіру, ел тарихына деген құрмет пен рухты күшейту.
Алдымен оқушыларға 1986 жылғы Желтоқсан көтерілісі жөнінде маңызды деректер ұсынылып, сол бір сұрапыл күндердің ащы шындығын бейнелейтін қысқаша танымдық бейнебаян көрсетілді. Сол кездегі жастардың тәуелсіздік жолындағы ерлігі мен өр рухы залға жиналғандарға ерекше әсер қалдырды. Одан кейін кештің құрметті қонақтары – Желтоқсан көтерілісінің тікелей куәгерлері, елге еңбегі сіңген азаматтар Марат Құрманқұлұлы, Қапиза Абдрашитқызы, Шәрікүл Әнуарқызы, Гүлнар Ізетқызы өз көздерімен көрген, жүректерімен сезінген сол қилы кезең туралы естеліктерімен бөлісті. Желтоқсаншылардың жүрекжарды әңгімелерін тыңдаған оқушылар оларға сұрақ қойып, ұлттық рухты, отансүйгіштік қасиетті терең сезіне түсті.
Шара барысында Тәуелсіздік күніне арналған тебіреністі жыр-арнаулар айтылып, өнер мектебінің ұстазы Абзал Мұхамедәліұлының шәкірттері орындаған әсерлі күймен жалғасын тапты. Кеш мазмұны ерлік пен елдікке тағзым, ұрпаққа өнеге болды. Тағылымды шараны киім дизайны сыныбының мұғалімдері Зайда Төлегенова мен Жанар Созақбаева ұйымдастырды.
Серік САТЫБАЛДИЕВ
Жамбыл ауданы
