Қаскелең мәдениет колледжінің түлектері бүгінде тек елімізде ғана емес, шетелде де жоғары бағаланып жүр. Қуанарлығы, олардың бірқатары өздері тәлім алған оқу орнымен байланысын үзбей, халықаралық ынтымақтастықтың кеңеюіне үлес қосуда. Жуырда аталған колледж Түркияның Стамбұл хорымен тәжірибе алмасу туралы меморандумға қол қойды. Бұл келісім шығармашылық бағыттағы серіктестікті нығайтып, жаңа мүмкіндікке жол ашатыны анық.
Колледж фойесінде түрік ағайындарды оқу орнының оркестрі қарсы алды. Содан кейін оларға мұндағы білім және тәрбие беру процесінің қалай ұйымдастырылғаны, студенттер мен оқытушылардың шығармашылық қызметінің қалай жолға қойылғаны таныстырылды. Түркиядан Қаскелеңге келген хор ұжымының өкілдері де өз ойларын ортаға салды. Сердар Таштаноғлының жетекшілігімен олар түрік тілінде әндер орындады.
Кездесудің маңызды бөлігі меморандумға қол қою рәсімі болды. Алдағы уақытта осы құжат негізінде екі мемлекет арасындағы мәдениет пен өнер саласындағы ынтымақтастық жалғасын табады. Соның аясында бірлескен мәдени жобаларды іске асыру жоспарлануда. Атап айтқанда, концерттер, көрмелер, театрлық қойылымдар мен фестивальдер өткізу көзделген.
Бір айта кетерлігі, осы кездесудің бастамашысы әрі ұйымдастырушысы – Қаскелең мәдениет колледжінің түлегі, тәжірибелі педагог Сымбат Асанова.
– 2014 жылдан бастап біз Түркияның Стамбұл, Чынарджик, Ялова, Айвалық сияқты қалаларымен мәдени байланыстарды дамыту бағытында жұмыс істеп келеміз. Стамбұлдан мәдениет қызметкерлерін Қаскелең мәдениет колледжіне шақырдық. Кездесу барысында шығармашылық ұжымдардың бірлескен жұмысы талқыланып, екі ел мәдениетінің дамуына бағытталған меморандумға қол қойылды. Қонақтар біздің ұлттық өнерімізбен танысты. Түркияға оралған соң, олар әлеуметтік желіде Қазақстаннан алған әсерлерімен бөліседі. Бұл біздің еліміздің имиджін одан әрі арттыра түсетіні сөзсіз, – деді ол.
Қуат Қайранбаев
Қарасай ауданы
