– «Қазавтожол» мен «Жасыл даму» компанияларына түсетін миллиардтаған қаражаттың ашықтығы мен бақылау тетіктері, есеп жүргізу жүйесі түсініксіз. Мұндай олқылықтар қаражаттың тиімсіз жұмсалуына және қоғам сеніміне кері әсер етуі мүмкін. Бұл компанияларға жыл сайын қомақты қаражат түседі. Соған қарамастан, мемлекет бюджеттен қосымша қаржы бөлуін жалғастырып келеді.
Айтылған мәліметтерге қарасақ, «Қазавтожол» кейінгі екі жылда 130 миллиард теңге жинаған. Биылғы жыл әлі аяқталмады. Сондай-ақ «Жасыл даму» акционерлік қоғамы да жұмыс істеп тұр. Осы аяқталмаған жыл ішінде олардың шотына 600 миллиард теңге түскен. Бұл – өте үлкен резерв.
Біз қазір өңірлерге 1 миллиард, кей жерде 500 миллион теңге қажет деп іздеп жүрміз. Ал осы екі компанияға келсек, мемлекет оларға бюджеттен қаржы бөлуін жалғастырып отыр. Тіпті 2026 жылға арналған бюджетке де қосымша қаражат енгізілген. Басқа компанияларды әзірге қозғамай-ақ қояйық.
Осы жерде мынадай заңды сұрақ туады: «Неге біз бұл компанияларға қосымша қаражат бөлеміз?» Бұл қаражат Бірыңғай қазынашылық шотын айналып өтеді. Яғни оған парламенттік және қаржылық бақылау әлсіз. Бюджеттік қаражатты пайдалану кезінде сақталуы тиіс рәсімдер де бұл жағдайда орындалмайды. Демек, бақылау әлсіреген және бұл жерде қаражаттың тиімді игерілуіне қатысты көп сұрақ туындайды. Мәселе тек бөлуде емес, осы қаржының бақылауында!
