Алматы облысының тұрғыны үйіне ағаш материалдарынан жасалған жылжымалы шкаф орнатуға тапсырыс береді. Шебермен алдын ала келісім түзіп, жалпы құны 1 000 000 теңге көлемінде қолма-қол төлем жасаған. Мердігер жұмысты белгіленген мерзімде аяқтауы тиіс болған.
Алайда орнатылған жиһаз тұтынушының талаптарына сәйкес келмейді: шкафтың есіктері дұрыс жабылмайды, өлшемдері көрсетілген жобадан өзгеше, материалдың сапасы да келісімшартта көрсетілген сипаттамаға сәйкес емес екені анықталады. Тұтынушы мердігерге хабарласып, кемшіліктерді жоюды немесе қаражатты қайтаруды сұрайды. Алайда мердігер «жұмыс атқарылды» деген себеппен талапты орындаудан бас тартады.
Өз құқығын қорғау мақсатында азамат Алматы облысы бойынша сауда және тұтынушылардың құқықтарын қорғау департаментіне жүгінеді. Департамент мамандары тұтынушыға тиісті заң нормаларын түсіндіріп, сатушыға/мердігерге жазбаша наразылық жолдауға көмектеседі. Жазбаша наразылық негізінде тараптар өзара келісіп, сотқа дейінгі реттеу іс шараларының негізінде тұтынушының сұрақтары шешілді.
Тұтынушыға 1 000 000 (бір миллион) теңге толығымен қайтарылды.
ҚОРЫТЫНДЫ
Бұл жағдай әрбір азаматқа келісімшарт жасасу, чек немесе төлем құжатын сақтау қажеттігін, кемшілік анықталған жағдайда талап қою құқығы бар екендігін еске салады.
Алматы облысы бойынша сауда және тұтынушылардың құқықтарын қорғау департаменті тұтынушылардың заңмен бекітілген құқықтарын қорғауға, түсіндіру жұмыстарына және туындаған дауларды шешуге әрдайым дайын.
