Облыс орталығындағы Жамбыл көшесінің бойында «KHAN courmet» кәсіпорнының халал стандартына сай өнімдерін сататын дүкен ашылды.
Осыған орай өткен салтанатты рәсімде алғашқы сөз кезегін алған облыстың бас имамы Мадияр Тағайбайұлы жиналған көпшілікті жаңа дүкеннің ашылуымен құттықтап, Қонаев ҚМДБ-ның халал стандарты бойынша сертификат алған сауда орнының тағы біреуге көбейгеніне қуанышты екенін жеткізді. Елімізде мұндай 5 мыңға жуық компания тіркелсе, облыс көлемінде 77 мекеме бар екенін алға тартты.
Келесі кезекте Қазақстан мұсылмандары діни басқармасы жанынан құрылған шариғат нормалары мен халал стандарт тәртібі бойынша стандарттау және сертификаттаумен айналысатын «Халал Даму» мекемесінің Алматы облысындағы өкілі Жанәбіл Жұмабеков «KHAN courmet» кәсіпорнының өкілі Талғат Хамзаұлына халал сертификатын табыстады.
– Бұл Қонаев қаласындағы халал стандартына сай келетін екінші дүкен. Бұған дейін «Маки Маки» дәмханасы сертификат алған болатын. Сондай-ақ «Бауырдақ» мейрамханасы да қажетті талап-шарттарды орындап, құжаттарын рәсімдеуде. Келісімшарт негізінде біздің тарапымыздан жоспарлы және ескертусіз тексерулер болып тұрады. Мал мен тауықтың жейтін жемінен бастап сойылу, тасымалдау, сату барысын қадағалаймыз, – деді Жанәбіл Жұмабеков.
Одан кейін Қонаев қалалық ардагерлер кеңесінің төрағасы Базарбай Оралбаев сөз алып, жаңа сауда орнының халыққа үлгілі қызмет көрсететініне кәміл сенімді екенін білдіріп, дүкеншілердің істеріне сәттілік тіледі.
«Жақсыны көрмек үшін» дегендей, осындай қуанышты сәтке куә болуға келген дүйім жұрт есігін айқара ашқан дүкен ішіне еніп, «KHAN courmet» кәсіпорнының өнімдерімен, бағасымен танысты. Ел игілігі үшін ашылған сауда орнында ет, шұжық, жартылай фабрикат өнімдерінің сан алуан түрі бар болып шықты.
Қазіргі уақытта дүкеннің ашылуы елді елең еткізерлік жаңалық бола қоймас. Дегенмен мұнда саудаланатын өнімдердің Ислам дінінің негізгі қағидаларын берік ұстанатын жандар үшін маңыздылығымен және бағасының нарықтағы бағадан төмендігімен ерекшеленетінін атап өткен жөн.
Айжарық КӨПТІЛЕУОВ
Қонаев қаласы
