Іле ауданы Боралдай кентіндегі «Арын қажы» мешітінде «Отбасындағы және бала тәрбиесіндегі әкенің рөлі» атты форум өтті. Тағылымды шараға Қазақстан халқы Ассамблеясы жанындағы аудандық ақсақалдар кеңесінің төрағасы Мақсат Сейдалиев, Іле аудандық аналар кеңесінің төрағасы Мейрамгүл Түйебайқызы, Іле ауданының бас имамы Талғат Сүлейменов, Ауған соғысы ардагерлері, ақсақалдар, көпбалалы аналар мен мектеп оқушылары қатысты.
Тәрбиелік мәні зор шарада ауданның бас имамы Талғат Сүлейменов мазмұнды баяндама жасап, отбасы құндылықтарына кеңінен тоқталды. Ол өз сөзінде: «Ислам діні отбасы институтына айрықша мән береді. Әке – отбасы тірегі. Исламда әкенің рөлі тек материалдық қамқорлықпен ғана шектелмейді, ол рухани, тәрбиелік әрі қоғамдық жауапкершілікті де өз мойнына алады», – деп атап өтті.
Ауған соғысының ардагері Мұхамедәлі Орманқұлұлы да ой-пікірін ортаға салып, ұрпақ тәрбиесіндегі әкенің орны туралы тағылымды әңгіме қозғады.
Боралдай кентіндегі аналар кеңесінің төрағасы Марқаба апамыз:
«Бала тәрбиесі оңай іс емес. Бұл жолда әкенің рөлі ерекше, себебі ол – бала үшін еліктеудің ең басты үлгісі әрі ақылшы тұлға», – деді.
Іле аудандық ұйғыр этномәдени орталығының жетекшісі Рашидам Ушурова еліміздегі татулық пен бірліктің маңызын атап өтті. «Қазақстанда 100-ден астам ұлт өкілі тату-тәтті өмір сүріп келеді. Барлығының жүрегінде бір ел, бір арман, бір сенім бар. Еліміздегі тыныштық пен бейбіт өмір – халқымыздың бірлігінің жемісі. Ал сол тыныштықтың бастауы – отбасы. Отбасындағы берекенің кепілі – ер азамат», – деп ол әкенің қоғамдағы рөлін айқындап өтті.
Екі сағатқа созылған тағылымды семинарды А.Тоқпанов ауылдық аналар кеңесінің төрағасы Баян Топарова қорытындылады. «Біз ардагерлер ретінде қоғамның өзекті мәселелерін жиі көтереміз. Әртүрлі жиындарда, мектептер мен Мәдениет үйлерінде болдық. Ал осындай маңызды тақырыпты алғаш рет қасиетті мешіттің іргесінде талқылап отырмыз. Бұл – үлкен мәні бар іс. Осы жиынға көпбалалы аналардың қатысуы қуантарлық жайт. Ұрпақ әкелу – үлкен сауап», – деді ол. Шараның құрметті қонағы, ұлағатты ұстаз Шынәділ Мұқанұлы қазақ қоғамында дана қариялар бабалар тарихын, ерлігін шежіре арқылы ұрпақ санасына сіңіріп отырған. Сондықтан дәстүрлі қазақ қоғамында әкеге деген құрмет ерекше орын алғанын тілге тиек етті.
Кездесу мазмұнды әрі тағылымға толы болды. Жиналған қауым рухани азық алып, шараны ұйымдастырушыларға ризашылығын білдірді.
Бағдат ШОЙБАС
Еңбекшіқазақ ауданы
