Кеген ауданында Тасашы ауылдық округі әкімі аппаратының жаңа әкімдік ғимараты пайдалануға берілді. Аталған нысанның құрылыс жұмысына бюджеттен 349,6 млн теңге бөлінген. Ғимаратты 8 ай көлемінде «Астана-Құрылыс» компаниясы тұрғызды. Мұнда заманауи құрал-жабдықтармен қамтылған жеті кабинет, бір конференц залы бар.
Жаңа ғимараттың ашылу салтанатына облыс әкімі аппаратының басшысы Мұрат Мәдіғұлов, Кеген ауданының әкімі Нұрбақыт Теңізбаев, аудандық мәслихат төрағасы Алмасбек Нұғыман, Райымбек ауданының Құрметті азаматы Рақымхан Нүптекеев, мекеме басшылары, қоғамдық ұйым өкілдері, ауыл әкімдері және ауыл тұрғындары қатысып, қуанышқа ортақтасты.
Алғашқы құттықтау сөз алған облыс әкімі аппаратының басшысы Мұрат Бақыткерімұлы:
– Бұл – ауыл тұрғындарына сапалы мемлекеттік қызмет көрсетуге бағытталған маңызды қадам, елдімекендерді дамытуға бағдарланған мемлекеттік саясаттың нақты көрінісі. Пайдалануға беріліп отырған әкімдік ғимараты стратегиялық бағдарламалардың жергілікті жерде іс жүзінде жүзеге асып жатқанының айқын дәлелі, – деді.
Келесі кезекте сөз алған аудан әкімі Нұрбақыт Молдахметұлы пайдалануға беріліп отырған ауылдық әкімдіктің жаңа ғимаратында мамандар үшін барлық жағдайдың жасалғанын айта келіп, осындай жайлы ортада мемлекеттік қызметкерлердің жаңаша жұмыс істейтініне сенім білдірді. Ғимараттың құрылыс жұмысын сапалы жүргізген «Астана-Құрылыс» жауапкершілігі шектеулі серіктестігінің құрышқолды құрылысшыларына алғыс айтты.
Бұдан соң Райымбек ауданының Құрметті азаматы Рақымхан Нүптекеев, ардагер-ұстаз Жеңіс Қарабалаев ыстық ықыласқа толы тілектерін жеткізіп, ақ баталарын берді.
Салтанатты шарада «Астана-Құрылыс» компаниясының директоры Нұрлан Қасымбаев ғимараттың символикалық кілтін Тасашы ауылдық округінің әкімі Ерболат Төребаевқа табыс етті.
Жаңа нысанның ашылуына қатысқан жергілікті тұрғындар да қуанышын жеткізді.
– Мен ұзақ жыл бойы ауылшаруашылық саласында жұмыс істедім. Бұрынғы ескі әкімдік ғимараты 1970 жылдары салынған, одан соң мамандар Мәдениет үйіне қоныстанды. Құрылыстың бригадирі Ерлан Исмайылов, құрылысшы Мұхит Жусанбеков сынды азаматтарға алғыс айтамын. Жаңа жыл қарсаңында бұл бәріміз үшін ерекше сый болды, – деді ауыл тұрғыны Сәрсенбай Мамырбаев.
Көптен күткен сәулетті ғимараттың лентасы қиылды. Ақ жаулықты аналар шашуларын шашып, құтты болсын десті. Алыс-жақыннан келген меймандар ғимараттың ішін аралап көрді. Аудандық Мәдениет үйінің өнерпаздары әуелете ән шырқап, көтеріңкі көңіл-күй сыйлады.
Жаңа нысанның халық игілігіне берілуі ауылдың болашағы баянды, келешегі кемел екенін айқындай түсті.
Дәурен ӘБУТӘЛІПОВ
Кеген ауданы
