Жаңа жыл қарсаңында Жедел жәрдем қызметі мен ветеринариялық ұйымдарға жаңа қызметтік автокөліктердің кілті табысталды. Салтанатты шарада сала мамандарын облыс әкімінің бірінші орынбасары Қанат Есболатов мерекемен құттықтап, халықтың денсаулығын сақтау мен тамақ қауіпсіздігін қамтамасыз етуде дәрігерлер мен ветеринария саласы мамандарының еңбегі ерекше екенін атап өтті.
– Өтіп бара жатқан жыл нақты істермен, мазмұнды бастамалармен және маңызды нәтижелермен есте қалды. Бүгін сол еңбектің қорытындысын жасап, өздеріңізбен мерейлі мереке аясында жүздесіп отырмыз. Облыста «Өнеркәсіпті дамыту қоры» ұсынған лизингтік бағдарлама шеңберінде әлеуметтік маңызы жоғары салаларға қолдау көрсетілді. Соның аясында 1,6 млрд теңгеге ветеринариялық салаға 71 бірлік арнайы техника, сондай-ақ жедел медициналық қызметке 4,4 млрд теңгеге 90 арнайы автокөлік сатып алынды. Жедел медициналық жәрдем қызметі – денсаулық сақтау жүйесіндегі ең маңызды сала. Сондықтан біз медициналық нысандарды салып, оларды техникамен жабдықтаумен қатар Жедел жәрдем автопаркін де кезең-кезеңімен жаңартып келеміз. Басты мақсат – кез келген елдімекенде тұрғындарға жедел әрі сапалы медициналық көмек көрсету. Бүгін Жедел жәрдем қызметі 20 жаңа санитарлық автокөліктермен толықтырылды. 2026 жылдың ақпан айына дейін лизингтік қаржыландыру арқылы тағы 70 санитарлық автокөлік жеткізу жоспарланған. Бұл әсіресе ауылдық жерлерде шақыртуға жету уақытын қысқартып, тұрғындарға көрсетілетін қызмет сапасын арттыруға мүмкіндік береді, – деді Қанат Болатұлы.
Салтанатты шараға қатысқан әр ауданнан келген еңбек ардагерлері Жедел жәрдем және ветеринариялық сала қызметкерлеріне «JAC T6» және «ГАЗ-231073» автокөліктерінің кілтін табыстады. Бұл көліктер құмды жерлер мен шалғай ауылдарға еш қиындықсыз қатынай алады. Сонымен қоса аталған автокөліктер алғашқы медициналық көмек көрсетуге арналған қажетті құрал-жабдықтармен қамтамасыз етілген.
Нақты деректерге жүгінсек, биыл аймақ аумағында «Ауылдық денсаулық сақтауды жаңғырту» ұлттық жобасы аясында 38 медициналық нысан салу жоспарланған. Олардың қатарында дәрігерлік амбулаториялар, фельдшерлік-акушерлік және медициналық пункттер бар. Жыл соңына дейін тағы екі амбулаторияның құрылысы аяқталады. Қазіргі таңда Алматы облысында бір Жедел жәрдем стансасы, 12 қосалқы станса және 64 ауылдық дислокация жұмыс істейді.
Облыс әкімдігінің мәліметінше, желтоқсан айына дейін ветеринария бөлімшелеріне 13 автокөлік берілген. Соңғы жеткізілімдерді қоса есептегенде, аймақтағы ветеринария саласының автопаркі 68 пайызға жаңартылған. Жаңа автокөліктер ветеринария мамандарының жұмыс тиімділігін арттырып, тұрғындардың өтініштеріне жедел әрекет етуге, профилактикалық және эпизоотияға қарсы іс-шараларды уақытылы жүргізуге, сондай-ақ ауылдық елдімекендердегі эпизоотиялық жағдайды бақылауды күшейтуге мүмкіндік береді.
Ермұрат МҰҚЫРБАЙ
