Халықаралық «Орталық – Оңтүстік» көлік дәлізінің «Астана – Қарағанды – Балқаш – Алматы» бағыты бойындағы маңызды буын саналатын республикалық «Күрті – Қонаев» автожолы қайта жаңғырды. Пайдалануға берілген жолдың жайын облыс әкімі Марат Сұлтанғазиев бағамдап қайтты.
Бүгінде ұзындығы 67 шақырым аралықты қамтитын төрт жолақты жолда көліктер жүре бастаған. Жөндеу жұмыстарынан кейін жолдың өткізу жолақтары кеңейтіліп, қауіпсіздік едәуір арттырылған, жүру уақыты қысқарған. Аталған жоба Еуропалық қайта құру және даму банкінің қаражаты есебінен қаржыландырылған. Қолда бар ақпаратқа негізделсек, қайта жаңғырту параметрлеріне сәйкес автожол І Б техникалық санатқа сай келіп, төрт жолақты қозғалысқа келтірілген.
Жоба шеңберінде төрт көпір құрылысы, бір көлік айырығы, айырық құрамындағы бір жол өткелі, бес көлік тоқтау алаңы және 61 су өткізу құбыры салынған. Нысан құрылысына 305 маман мен 104 бірлік құрылыс техникасы жұмылдырылған. Кәсіби мамандардың сөзіне сүйенсек, аталған жоба транспорттық-логистикалық инфрақұрылымды дамыту, жұмыс орындарын ашу және бизнесті өркендетуге мол мүмкіндік ашпақ.
«Ұзындығы 67 шақырымды құрайтын «Күрті – Қонаев» автомобиль жолы – Алматы облысының көлік инфрақұрылымын жаңарту жөніндегі жүйелі жұмыстың бір бөлігі. Тек биылдың өзінде аймақта облыстық маңызы бар 178 шақырым жол және көше-жол желісінің 473 шақырымы ретке келтірілді. Сондай-ақ «ҚазАвтоЖол» ұлттық компаниясымен бірлескен жұмыстың нәтижесінде республикалық маңызы бар 341 шақырым автожол жөндеуден өтті. Бұл жобалар жол жүру уақытын қысқартуға, қозғалыс қауіпсіздігін арттыруға және бизнес пен облыс тұрғындары үшін анағұрлым қолайлы жағдай жасауға мүмкіндік береді», – деп бастаманың маңызын атап өтті облыс әкімі Марат Сұлтанғазиев.
«ҚазАвтоЖол» ұлттық компаниясы» АҚ-ның мәліметіне сүйенсек, 2025 жылы 341 шақырым автожол жөнделген. Оның 109 шақырымына қайта жаңғырту жұмысы жүргізілсе, бір шақырым жол күрделі жөндеуден, 232 шақырым жол орташа жөндеуден өткен. «ҚазАвтоЖол» ұлттық компаниясы» АҚ 2026 жылы Алматы облысында жол жобаларын жүзеге асыруды одан әрі жалғастырады. Оның ішінде өтпелі учаскелерді аяқтау және республикалық автожол пайдаланушылары үшін қозғалыс қауіпсіздігін, өткізу қабілетін әрі жайлылықты арттыруға бағытталған жобалар бар.
Ерзат АСЫЛ
