Балқаш аудандық дене шынықтыру-сауықтыру спорт кешенінде қазақ күресінен жасөспірімдер арасында Екінші дүниежүзілік соғыстың ардагері, ұлағатты ұстаз Алтынбай Бейсебековті еске алуға арналған облыстық турнир өтті.
Сайысқа облыс көлеміндегі барлық аудандар мен Алматы қаласынан, сондай-ақ Жетісу, Түркістан және Ақтөбе облысынан 2010-2011 жылдары туған жас балуандар қатысты. Олар бозкілемде 10 салмақ дәрежесі бойынша күш сынасты.
Жарыстың ашылу салтанатында Балқаш ауданының әкімі Азат Құтпанбетов майдангер ұстазды еске алуға арналған спорттық шараның жыл сайын дәстүрлі түрде өткізілетінін айтып, оның ұрпақ тәрбиесі жолында сіңірген еңбегіне тоқталды. Бұдан кейін облыстық дене шынықтыру және спорт басқармасының басшысы Ақжүрек Таңатаров аталған турнирді ұйымдастырған Балқаш ауданының Құрметті азаматы Мұратбек Бейсебековті «Спорт жанашыры» төсбелгісімен марапаттады.
Жетісу облыстық дене шынықтыру және спорт басқармасының басшысы Ұлан Рысқұл және «Қазақстан барысы» республикалық турнирінің үш дүркін жеңімпазы Бейбіт Ыстыбаев жарысқа қатысушыларға сәттілік тіледі. Алтынбай Бейсебековтің туыстары атынан сөз кезегін алған Сүлеймен Жүнісов марқұмның ұстаздық жолда атқарған еселі еңбегі мен ағайын-туысқа деген сыйластығын, ұлағатты сөздерін еске алып, турнирдің өткізілуіне атсалысып жатқан аудан әкімдігіне және спорт саласының қызметкерлеріне ризашылығын білдірді.
Турнирге қатысқан 200-ден астам жас балуан өз салмақ дәрежесінде бәсекеге түсті. Жарыс қорытындысы бойынша Алматы облысынан Әлихан Сағатов пен Ерсұлтан Сағызбек, Алакөлден Дарын Мәулітбекұлы мен Жанат Кенжебайұлы, Алматы қаласынан Нұрлыбек Мақсатбай мен Мирас Іңкәр, Ақтөбе облысынан Ислам Өмірзақ, Жетісудан Бекзат Қоғайбек және Түркістаннан Иманғали Бақдәулет топ жарды. Жеңімпаздар мен жүлдегерлер медаль, грамота және ақшалай сыйлықтармен марапатталды.
Бақтығали ДӘУІТБАЕВ
Балқаш ауданы
