Қарасай ауданында «Зорлық-зомбылыққа қарсы белсенді іс-әрекеттердің 16 күні» акциясы аясында көптеген іс-шара ұйымдастырылды. Солардың бірі – мектеп оқушылары мен колледж студенттері арасында өткен «Жан жарасы» тақырыбындағы бейнероликтер байқауы. Аталмыш байқаудың өтуіне аудандық полиция басқармасының отбасылық-тұрмыстық зорлық-зомбылыққа қарсы бөлім қызметкерлері мен ішкі саясат бөлімі ұйытқы болды. Жеңімпаздарды марапаттау рәсімі Қаскелең қаласындағы Мәдениет үйінде өтті.
Қазылар алқасының құрамында облыстық полиция департаментінің отбасылық-тұрмыстық зорлық-зомбылыққа қарсы бөлімінің қызметкерлері Динара Тәңірберген мен Гүлзада Сабырова, аудандық отбасын қолдау орталығының директоры Елена Константинова және ішкі саясат бөлімі басшысының орынбасары Айжан Балажанова болды. Қатысушылардың жұмыстарын бағалау кезінде бейнероликтің мазмұны, тақырыпқа сәйкестігі, әлеуметтік мотивациясы, түсірілім мен монтаждың сапасы ескерілді.
Қазылар алқасының шешімі бойынша бас жүлдені Қаскелең мәдениет колледжі жеңіп алды. С. Керімбеков атындағы орта мектеп – 1-орын, Еуразия көпсалалы колледжі – 2-орын, ал «Аяжан Қарасай» медициналық колледжінің студенттері 3-орынды иеленді. Жеңімпаздар мен үздік қатысушыларға дипломдар мен естелік сыйлықтар табыс етілді. Оларға белсенді азаматтық ұстанымдары, қоғамдық маңызы бар тақырыпты жарыққа шығарып, мазмұнды, жүрек тебірентерлік бейнероликтер дайындағаны үшін алғыс білдірілді.
– Байқау жас ұрпақтың қоғамдағы маңызды мәселелерге бейжай қарамайтынын және адам құқықтарын қорғауға ұмтылатынын көрсетті. Аудандағы жастардың осындай әлеуметтік маңызы бар бастамаларға қатысуы қауіпсіз орта қалыптастыруға, өскелең ұрпақты үйлесімді тәрбиелеуге және зорлық-зомбылықсыз салауатты қоғамды тұрақты дамытуға елеулі үлес қосады, – деді шараны қорытындылаған аудандық полиция басқармасының отбасылық-тұрмыстық зорлық-зомбылыққа қарсы бөлімінің бастығы, полиция подполковнигі Элмира Есенбаева.
Қуат ӘБІЛҰЛЫ
Қарасай ауданы
