Бүгін Мемлекет басшысы Қасым-Жомарт Тоқаевтың «Түркістан» газетінде «Қазақстан жаңғырудың жаңа кезеңіне қадам басты» атты көлемді сұхбаты жарық көрді. Жас кезінен мерзімді баспасөзді үзбей оқитынын айтқан Президент:
«Газет-журналдар қайта өрлеу дәуірінің бастауында тұр. Себебі, әлеуметтік желі адамның ойлау қабілетіне зор зиян келтіріп жатыр. Жасы қырыққа жетсе де, білімі мен ой-өрісі он бес жастағы жасөспірімдер деңгейінде қалып қойған азаматтарды қазірдің өзінде кездестіруге болады» – деген Мемлекет басшысы әлеуметтік желілердің адамның танымдық қабілетіне тигізер кері әсерін ашық айтты.
Президент өз сұхбатында саяси реформалар, жасанды интеллект, ұлттық экономика, әлеуметтік салаларға кеңінен тоқталды.
Онда ел президенті әскери борышын өтеуге шақырылған сарбаздардың жарақат алуы мен қаза болуына қатысты оқиғаларға пікір білдірді.
Оның айтуынша, әскери борышын өтеуге шақырылған сарбаздардың, жарақат алуы мен қаза болуына қатысты оқиғалар өркениетті елге жат, теріс үрдіс. Бейбіт заманда мұндай жайттар болмауы тиіс.
«Қорғаныс саласына жауапты мекеменің басшылығын тәрбие жұмысын дұрыс қадағаламай отырғаны үшін сынға алдым. Армия жастарға қолдау көрсетіп, оларды еліміздің нағыз азаматы ретінде тәрбиелеп шығаруы керек. Әскерде әлімжеттікке, бұзақылыққа, рушылдыққа, жершілдікке орын жоқ, ондай жайттарға жол берілмейді. Мұның бәрін өзім жеке қадағалап отырамын»- деді ол.
Президент жастардың нағыз білім-ғылым жолына түсуге талпынып жатқанына сенім білдірді.
Болат Әділжанұлы,
Кеген аудандық қоғамдық кеңестің төрағасы
