Соңғы уақытта Алматы облысының ветеринариялық қызметінде материалдық-техникалық базаны жақсартуға байланысты оң өзгерістер орын алуда. Атап айтқанда, жаңа ветеринариялық пункттер ашылып, көлікпен қамтамасыз ету жұмысы жүргізілуде. Бұл игі бастамалар Қарасай ауданын да айналып өткен жоқ.
Мәселен, Әйтей ауылында заманауи блокты-модульді ветеринариялық пункттің жаңа ғимараты салынды. Сонымен қатар Елтай ауылдық округінің ветеринариялық пункттеріне «NIVA» маркалы автокөлік беріліп, тағы бес ауылдық округке «JAC T6» және «ГАЗ 2310773» маркалы автокөліктер тапсырылды.
– Әйтей ауылындағы блокты-модульді ветеринариялық пункт пен жаңа автокөліктер ветеринария мамандарының жұмыс тиімділігін арттыруға, тұрғындардың өтініштеріне жедел жауап беруге, профилактикалық және түрлі індеттерге қарсы іс-шараларды уақытылы жүргізуге, сондай-ақ ауылдық елдімекендердегі жағдайды бақылауды күшейтуге мүмкіндік береді, – дейді Қарасай аудандық ветеринария бөлімінің басшысы Жанат Жарболов.
Оның айтуынша, алдағы жылы ветеринариялық қызметтің материалдық-техникалық базасын нығайту жұмысы жалғасын табады. Осы орайда жаңа блокты-модульді ветеринариялық пункттер салу және қалған ауылдық округтерді автокөлікпен қамтамасыз ету жоспарлануда.
Қуат Қайранбаев
Қарасай ауданы
