Іле ауданы Байсерке ауылында Жаңа жыл шарасы ерекше форматта ұйымдастырылды. Аяз ата мен Ақшақар тікұшақпен жерге түсіп, жұртшылықты таңғалдырды. Олар ауыл тұрғындарын Жылқы жылының басталуымен құттықтады. Аэродромға 5000-нан астам адам жиналып, авиашоуды тамашалады.
Сахнада ертегі кейіпкерлері қонақтарға көтеріңкі көңіл-күй сыйласа, аспанда ұшқыштар өнер көрсетті. Сонымен қатар парашют спортының шеберлері де мерекеге ерекше сән қосты. Олар арнайы киімдермен аспанда думанды кештің ажарын аша түсті.
Шарада Қазақстан авиаспорт федерациясының вице-президенті Тимофей Меркулов сөз алып, жастарға парашют спортының ерекшелігін кеңінен атап өтті. «Парашютпен секіру – бұл тек спорт емес, өмірге деген ерекше көзқарас, адреналин мен еркіндік. Жастарды осы спорт түрін үйренуге және онымен айналысуға шақырамын», – деді ол. Облыстық туризм басқармасы бөлімінің басшысы Асқар Қасенов экотуризмнің аймақта қарқынды дамып келе жатқанын сөз етті. Оның айтуынша, авиация шоуы мен экошаралар балалар мен жасөспірімдердің қызығушылығын арттыруға зор мүмкіндік береді.
Ұйымдастырушылардың айтуынша, бұл шараға қызығушылық күннен-күнге артып келеді. Алдағы уақытта Наурыз мейрамында да аспанда осындай шоу өткізу жоспарланып отыр.
Бағдат ШОЙБАС
Іле ауданы
