Конституциялық реформалар жөніндегі комиссия бірнеше күн бойы өткен талқылаудан соң бүгін Қазақстан Республикасының жаңа Ата Заңының жобасын жариялады. Конституциялық комиссия Жаңа Ата Заңның жобасында Қазақстанның мемлекеттік ұйымдастырылуын айқындайтын, егемендігі мен дербестігін нығайтатын іргелі ережелер қарастырылуымен ерекшеленді.
Конституциялық Сот төрағасының орынбасары Бақыт Нұрмұханов Конституцияның жобасын таныстырып, аталған ережелер «Конституциялық құрылыстың негіздері» атты бірінші бөлімге енгізілгенін атап өтті. Құжатқа сәйкес, Қазақстан Республикасы – унитарлы мемлекет. Басқару нысаны – президенттік республика деп тұжырымдалғаны айтылды. Еліміздің әкімшілік-аумақтық құрылысын қатардағы заңмен емес, конституциялық заңмен айқындау да ұсынылған. Сондай-ақ 4-бапта мемлекеттік биліктің бірден-бір бастауы және егемендік иесі – Қазақстан халқы деп жазылуы да көңілге қуаныш ұялатады.
Конституция жобасындағы ережелер «Күшті Президент – Ықпалды Парламент – есеп беретін Үкімет» тұжырымдамасына сай келетіні де ел болашағына деген сенімді нығайтады.
Аида Әлдиқасымова,
жеке кәсіпкер
Талғар ауданы
