Кеген ауданы Саты ауылындағы көшелердің біріне ерлігі ел есінде қалған соғыс және еңбек ардагері Сейпіл Әбдімомыновтың есімі берілді. Салтанатты шараға Кеген ауданы әкімінің орынбасары Медет Исаев, қоғамдық ұйым төрағалары, ауыл тұрғындары мен соғыс ардагерінің ұрпақтары қатысты.
– Сейпіл атамыздың өмір жолы табандылықтың, отансүйгіштіктің, адалдықтың шынайы үлгісі болды. Ол майдан даласында жаумен кескілесе шайқасты. Елге оралған соң Саты ауылының өркендеуіне, жас ұрпақтың тәрбиесіне өз үлесін қосты. Оның азаматтық болмысы, адамдық қасиеті біз үшін қашанда қастерлі. Ардагерлер ерлігі – ұрпаққа өнеге, – деді аудан әкімінің орынбасары Медет Исаев.
Майдангердің қызы Мая Әбдімомынова, немересі Болат Рахимов атасының абыроймен атқарған қызметі мен еселі еңбегіне тоқталды. Саты ауылдық ақсақалдар алқасының төрағасы Есбол Рысбаев майдангер есімін дәріптеу өнегелі іс екенін айтып, көпшілікке ақ батасын берді.
Сейпіл Әбдімомынов 1920 жылы Саты ауылында дүниеге келген. Жастық шағының ең бір қымбат кезеңін соғыс оты шарпып өтті. 1942 жылы майданға аттанып, елін жаудан қорғайды. 1945 жылы соғыстан оралған Сейпіл ата туған жерінің гүлденуіне бар күш-жігерін салып, елі үшін сіңірген еңбегі ауыл халқының жүрегінде мәңгілік із қалдырды. «Ұлы Отан соғысы» орденімен және бірнеше медальмен марапатталған.
Шара соңында майдангер атамыздың рухына дұға бағышталып, ас берілді. Болашақ ұрпақтың алаңсыз өмір сүруі үшін аянбай тер төккен, жанын қиған ерлердің есімі халық жадында сақталып, елімен бірге мәңгі жасай бермек.
Дәурен ӘБУТӘЛІПОВ
Кеген ауданы
